Jylynyp alyńyz, jolaýshy

Bıyl óńirge qar jyldaǵydan erterek tústi. Ara-tura aıaz qataıyp, «kári qudań» qaharly qys minez tanytyp ta qoıady. Qalaı bolǵanda da, qysqy aýa raıynyń ózindik naǵyz tosyn minez tanytatyn kezi alda ekenin eskersek, jolaýshylar úshin de, jol qyzmetkerleri úshin de jeńil bolmaıtyny ańǵarylady. Bir sózben aıtqanda, qysqy joldyń qaýpi kóp. Ony ótken jylǵy qystaǵy qıyndyqtar da umyttyra qoıǵan joq. Oblystyq ákimdikte ótken keńeste memlekettik organdardyń atqarýshylyq tártibi, jergilikti jáne respýblıkalyq mańyzy bar avtomobıl joldaryn qysqy kezeńde jaraqty etip ustaý máseleleri, sondaı-aq, memlekettik jáne úkimettik baǵdarlamalardy júzege asyrýǵa qatysty aǵymdaǵy ahýal jaıynyń talqylanýy da sondyqtan. Aımaqtaǵy avtojoldardyń jalpy uzyndyǵy 6983,9 shaqyrymnan astam bolady. Oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıevtiń aıtýynsha, jergilikti mańyzy bar 5090,1 shaqyrym joldy ustaýǵa 305,7 mıllıon teńge bólingen. Bul jumystarmen 31 kásiporyn shuǵyldanady, olardyń qaramaǵynda 201 tehnıka birligi jumys isteıdi. Búgingi kúni 2424,5 tonna taıǵaqqa qarsy jáne ınertti materıaldar, 322,3 tonna mólsherinde dızel otynynyń qory jasaldy. Budan basqa, merdigerlik uıymdar qar jaldaryn turǵyzý arqyly jol boıynda qar ustaý jumystaryn júrgizýde. Qolaısyz aýa raıy jaǵdaıynda júrgizýshiler men jolaýshylardyń qaýipsizdigin qamtamasyz etý úshin 49 jylyný pýnktteri daıyndaldy. «Qazaqavtojol» RMK oblystyq fılıaly Aqtóbe oblysyndaǵy respýblıkalyq mańyzy bar 1893,8 shaqyrym joldyń jaraqtylyǵy úshin jaýap beredi. Osy aýqymdaǵy jumystarǵa bıylǵy qysqa 457,6 mıllıon teńge bólingen. Jyldyń sońyna deıin bul mekeme 13 qar tazalaǵysh tehnıkamen tolyqtyrylady. Kidiristerge jol bermeý jáne júris joldaryn der kezinde tazalaý úshin jalpy uzyndyǵy 4,7 shaqyrym qar ustaıtyn qalqandar turǵyzyldy, jergilikti atqarýshy organdardyń kómegimen «RF shekarasy (Samara) – Shymkent» avtojoly boıynan júrgizýshilerdiń aýa raıy buzylǵan jaǵdaıda kólikterin ıesiz qaldyrmaı, sol jerde bolýy úshin avtokólik quraldary turatyn 3 aıaldaý alańdary ázirlendi. Keńes qorytyndysynda oblys ákimi Berdibek Saparbaev jaýapty memlekettik organdar men merdigerlik uıymdar basshylaryna joldy jaraqty ustaý úshin mindettemeleriniń tıisti deńgeıde oryndalýyn qamtamasyz etýdi tapsyrdy. Satybaldy SÁÝIRBAI, «Egemen Qazaqstan» Aqtóbe