«Qazaq eli» fılmi túrik tiline aýdarylady

Bolashaqta «Qazaq eli» anımasııalyq fılmi sheteldik kórermenge jol tartýy múmkin. Ázirge, otandyq ónimdi 80 mıllıon aýdıtorııasy bar túrik tiline aýdarý kózdelip otyr.  Igi bastamany Shymkenttegi «Saq» kınostýdııasy men «Ońtústik-fılm» memlekettik mekemesi júzege asyrady. Bul týraly búgin Ońtústik Qazaqstan oblysynyń ákimi Janseıit Túımebaev otandyq fılmder jasaýmen aınalysatyn stýdııamen tanysý barysynda málim boldy, dep habarlaıdy QazAqparat. Qazaq eliniń tarıhı taǵdyryn beıneleıtin mýltfılm elimizde alǵash ret QR Mádenıet jáne sport mınıstrliginiń tapsyrysy negizinde daıyndalǵan. «Búgingi bastamalaryńyz tereń talqylaýdy qajet etedi. Jobalaryńyzdy áli de pysyqtaı túsińizder. Naqty ssenarıılerińizdi aldaǵy ýaqytta birge qarap, óz tarapymyzdan qoldaý bildiretin bolamyz. Al «Qazaq eli» anımasııalyq tolyqmetrajdy týyndylaryńyzdy Túrkııa memleketindegi tıisti oryndarmen kelisim júrgizý arqyly ońtaıly sheshemiz»,-  dedi oblys ákimi J.Túımebaev. «SAQ» kınostýdııasynyń bas dırektory Nurıddın Pátteev oblys ákimine «Kóne jetigenniń syry», «Otyrardy qorǵaý», «Qajymuhan», syndy tarıhı oryndar men tulǵalar týraly túsiriletin anımasııalyq fılmderdiń jelisin jan-jaqty baıandap berdi. Sondaı-aq ol Ahmet Iаsaýı babamyz ben  kúsh atasy  Qajymuhannyń tulǵasyn tanytatyn mýltfılmin túsirý jobasymen tanystyryp, qoldaý kórsetýin surady. 15 jyldyq tarıhy bar «SAQ» kınostýdııasy buǵan deıin «Qazaq eli», «Sapa olımpıadasy», «Qoshqar men teke», «Momyn men qaraqshy»  syndy 50-den astam anımasııalyq týyndylar daıyndaǵan. Al, 25 serııaly «Tompaq» fılmi kórermenniń aıryqsha yqylasyna bólengen. Aımaq basshysy Janseıit Túımebaev  mýltıplıkasııalyq tarıhı fılmder arqyly óńirimizge keletin sheteldik týrısterdiń qataryn artyrýǵa bolatynyn aıtty.