Qaraǵandy oblysyndaǵy Shahan kentinde bes qabatty turǵyn úıdiń bir kireberisi túgeldeı
opyrylyp qaldy. Qazirgi ýaqytta qutqarýshy top bes adamdy, onyń ishinde eki balany qırandynyń astynan aman alyp shyqty.
Sońǵy derekter boıynsha, apat saldarynan toǵyz adam qaza tapqan. Marqumdardyń tizimi keıbir saıttarda jarııa bolyp úlgergenmen, oblys ákiminiń baspasóz qyzmeti bul aqparattyń resmı emestigin alǵa tartyp, jańsaq derekterdiń bolýy múmkin ekendigin eskertti.
Apat bolǵan jerde qutqarýshylar úıindini arshyp, zardap shekkenderdi izdestirý jumystaryn júrgizip jatyr. Bul sharaǵa qutqarýshylar, jedel járdem, polısııa qyzmetkerleri, jergilikti bılik organdarynyń ókilderi, Ulttyq ulan sarbazdary, barlyǵy 280-ge jýyq adam jáne aýyr tehnıka jumyldyrylǵan.
Sonymen qatar, apattyń naqty sebep-saldaryn anyqtaý jumystarymen arnaıy qurylǵan jedel shtab aınalysýda. Ony Qaraǵandy oblysynyń ákimi Nurmuhamed Ábdibekov basqarady.
Eske salar bolsaq, Shahan kenti aýmaqtyq-terrıtorııalyq bólinis boıynsha Shahtınsk qalalyq ákimdigine baǵynyshty. Eldi meken oblys ortalyǵynan 35 shaqyrym jerde ornalasqan. Kentte 8 myńnan astam adam turady.
Qaırat ÁBILDINOV,
«Egemen Qazaqstan»
