Den Embroýz: Alvares Golovkınmen tezirek jekpe-jek ótkizýi tıis

Boxingnews24.com portalynyń sholýshysy Den Embroýz amerıkalyq kishi Floıd Meıvezerdiń jaqynda bergen suhbatyna qatysty óz pikirin bildirdi. Bul týraly vesti.kz habarlady. Amerıkalyq boksshy meksıkalyq Saýl Alvares (48-1-1, 34 KO) qazaqstandyq Gennadıı Golovkınmen (36-0, 33 KO) judyryqtasar bolsa, ýaqytynan buryn nokaýtpen jeńetinine senimdi ekenin aıtqan. Sondaı-aq, jekpe-jektiń qazir ótýi tıimsiz ári qarjy máselesin josparly túrde júzege asyrǵan jón ekenin eskertken. «Keıbir jankúıerler Meıvezerdiń sózin jeleý etip, «Kanelonyń» Golovkınmen kúsh synasýdan bas tartýy durys dep esepteıdi. Al meniń oıymsha, Alvares bul kezdesýden jaltaryp júr. GGG ashyq túrde judyryqtasqysy keletinin málimdegenmen, meksıkalyqtan áli kúnge deıin mardymdy jaýap bola qoımady», – dedi sholýshy. «Golden Boy áli ýaqyty kelmegenin aıtady. Biraq ol kún qashan keledi? Golovkın birneshe aıdan keıin 35-ke keledi. Tıisinshe, onyń sporttaǵy jasy da kelip qaldy. Biraq áli de joǵary deńgeıde óner kórsetip júr. Keıbireýler Kell Brýkpen ótken urysynda olqylyqtary kórinip qalǵanyn aıtady. Golovkınniń birneshe joıqyn soqqy jiberip alǵany ras. Biraq brıtanııalyqtyń kózin shyǵara jazdap, ýaqytynan buryn jeńgenin umyt qaldyryp jatady. Ol kúni másele kúshinde emes qorǵanysynda bolǵanyn eskergen jón», – dedi Den Embroýz. «Meıvezerdiń aıtýy boıynsha, Alvareske ol laıyqty qarsylas emes eken. Olaı bolsa, kezdesý áldeqashan buryn ótýi tıis edi. «Kanelo» men Golden Boy bul isti keıinge qaldyrǵany fanattardy Golovkınnen qashyp júrgendeı sezimde qaldyryp jatady. Bálkim Golovkınniń qartaıǵanyn kútip júrgen bolar?! Floıdtyń sózin rastaý úshin qos sportshynyń arasyndaǵy boks keshin tezirek kórýimiz kerek», – dedi Embroýz. Aıta keteıik, bul is 2016 jyly ótýi tıis bolatyn. Biraq mamyr aıynda meksıkalyq bas tartqandyqtan orta salmaqtaǵy onyń WBC belbeýi Gennadııge berildi. Sonymen qatar, Alvarestiń Golovkınmen jekpe-jegin bıylǵa josparlaǵany da habarlanǵan. Qos tarap qarjy máselesinde ortaq kelisimge kele almaǵandyqtan qazir kelissózder toqtap tur.