Májilis depýtattary jumys saparymen Qostanaı oblysyna bardy

Májilis depýtattary jumys saparymen Qostanaı oblysyna baryp, sharýalarmen júzdesti, dep habarlady 24.kz. Munda olar agrarlyq salaǵa qatysty qabyldanǵan zań normalarynyń jergilikti jerde qalaı júzege asyp jatqanymen tanysty. Aıta ketý kerek, ótken jyly Parlament «100 naqty qadam ult jospary» sheńberinde 52 zań jobasyn bekitti. Solardyń kem tusy bolsa qaıta qarap, tolyqtyrý da – sapardyń bir maqsaty. Sondaı-aq, depýtattar agroónerkásip salasyn damytýdyń 2017-2021 jyldarǵa arnalǵan jańa baǵdarlamasyn talqyǵa saldy. Mal sharýashylyǵy salasynda básekege qabiletti ónim shyǵarý - basty nazarda. Bul rette usaq sharýashylyqtardy kooperatıvke biriktirýdiń mańyzy zor. «Barlyǵymyz túsinip otyrmyz bir jerge birigý kerek, birikken kezde jańa agrotehnologııalardy qoldanýǵa múmkindik beredi. Bankterdiń aýyldaǵy osy sharýashylyqtarǵa degen senimi kóbeıedi. О́nimdi satý máselesi de biraz qıyndyqtar týdyrady. Satý úshin qoımalar kerek, kólik ıgersek, sonyń bári birigip bir jerden sheshiletin bolsa, bul shyǵarylatyn ónimniń baǵasyn tómendetýge múmkindik beredi», – QR Parlamenti Májilisiniń depýtaty Saparhan Omarov.