Dáýren Abaev otandyq telearnalarǵa kórermenniń ne sebepti kóńili tolmaıtynyn aıtty

QR QR Aqparat jáne kommýnıkasııalar mınıstrliginiń keńeıtilgen alqa májilisinde vedomtsvo basshysy Dáýren Abaev otandyq telearnalarǵa kórermenniń ne sebepti kóńili tolmaıtynyn aıtty. «Biz júrgizgen áleýmettik saýalnamaǵa sáıkes jarnamanyń kóptigi, óńirlik kontenttiń bolmaýy, Qazaqstan týraly tanymdyq baǵdarlamalardyń jetkiliksizdigi jáne qazaqstandyq televıdenıedegi jýrnalısterdiń kásibıliginiń tómendigi halyqtyń kóńil tolmaýshyǵyn týyndatady. Bizdiń telearnalar muny barynsha baıyppen oı eleginen ótkizip, kórmermenniń senimine ıe bolýy úshin qajetti sharalardy qabyldaýy tıis. Osy oraıda televıdenıe men radıony damytý boıynsha jumystardyń kelesi basymdyqtaryna toqtalǵym keledi», - dedi Abaev. Bul rette mınıstr eń aldymen otandyq serıaldardyń sheteldik serıaldarmen salystyrǵanda básekege qabilettiligin arttyrý qajettigin atap ótti. «2017 jyly kórsetiletin serıal ónimderdiń kommersııalyq telearnalarda da sanyn arttyrý josparlanýda. Serıaldar negizinde kınoprokat qyzmetin júzege asyrý úshin tolyqmetrajdy kınotaspalar jasalatyn bolady. Ekinshiden, KRI júıesin engizý arqyly teleradıo arna qyzmetkerleriniń biliktiligi men kásibıligi jetile túsedi. Qyzmetkerlerdi konkýrstyq irikteý jetildirilip, kadrlyq rezerv qalyptastyrylady», - dedi ol. «Biz eldiń shekaralyq aımaqtarynda memlekettik radıoarnalardyń qamtý aımaǵyn jáne taratý sapasyn arttyratyn bolamyz", degen mınıstr telearnalardy HD formatyna kóshirý jumystary jalǵasa beretinin aıtty. Onyń aıtýynsha, tek sodan keıin ǵana biz jetekshi álemdik resýrstarmen shynaıy básekeles bola alamyz. "Aaǵymdaǵy jyly sandyq efırlik teletaratýdy engizý aıasynda 244 radıotelevızııalyq stansııa salynyp, paıdalanýǵa beriledi. Jyldyń sońyna deıin Qazaqstannyń birqatar oblystarynda sandyq taratýǵa tolyqtaı kóshý josparlanýda. Aqparat komıteti BAQ salasyndaǵy memlekettik saıasat departamentimen birlesip, barlyq osy sharalardyń sapaly oryndalýyna baqylaý júrgizýi tıis", - dedi Abaev.