Munaı óndirý, qaıta óńdeý kólemin arttyrý qajet - Nazarbaev

Búgin Memleket basshysy Nursultan Nazarbaev Energetıka mınıstri Qanat Bozymbaevty qabyldady. Vedomstvo basshysy Prezıdentke energetıka salasyn damytýdyń basty kórsetkishteri jáne osy sektordaǵy jobalardy odan ári jańǵyrtý josparlary týraly baıandady, dep habarlaıdy Aqordanyń resmı saıty. Kezdesý barysynda Elbasy energetıkalyq shıkizat óndirý jáne qaıta óńdeý salasyndaǵy jobalardy iske asyrý qajettigine nazar aýdardy. "Qashaǵanda munaı óndirý jumystary bastaldy. Teńiz ken ornynyń aıasyn keńeıtý týraly sheshim qabyldandy. Sonymen qatar, Qarashyǵanaqqa qatysty másele sheshimin tapty. Osyǵan baılanysty munaı óndirý jáne ony qaıta óńdeý kólemin arttyrý qajet. Bul úshin biz munaı óńdeıtin úsh zaýytty qaıta jańǵyrtyp jatyrmyz," – dedi Nursultan Nazarbaev. Sondaı-aq, Qazaqstan Prezıdenti gaz óndirý, eldi gazdandyrý jumystaryn júrgizýdiń, Balqash jylý elektr stansasynyń qurylysyna qatysty máselelerdi sheshýdiń, sondaı-aq energetıka salasyndaǵy nysandardy jekeshelendirýdiń mańyzdylyǵyn atap ótti. Energetıka mınıstri energııa resýrstaryn óndirý jónindegi jospardyń jekelegen kórsetkishter boıynsha artyǵymen oryndalǵany, sondaı-aq 2016 jyldyń qorytyndysy boıynsha munaı eksporty artqany týraly habarlady. "Munaıdy óndirý jospary 75,5 mıllıon tonna bolsa, óndirilgen munaıdyń naqty kólemi 78 mıllıon tonnaǵa jetti. Qashaǵandaǵy munaı óndirisi esebinen jospardyń artyǵymen oryndalǵany baıqalady, onda byltyr 1 mıllıon tonnaǵa jýyq munaı alyndy. Munaı eksportyn 62 mıllıon tonnaǵa deıin arttyrdyq, onyń 40 mıllıon tonnasy Kaspıı qubyr konsorsıýmy arqyly tasymaldandy. Memleket qoldaýynyń arqasynda alǵash ret 325 myń tonna bıtým qaıta óńdeldi. Suıyq gaz óndirisiniń kólemi 136 tonnaǵa artty," – dedi Q.Bozymbaev. Sonymen birge Energetıka mınıstri Memleket basshysyna óndirýshiler men treıderler arasyndaǵy kelisim nátıjesinde avtojúrgizýshiler qajettiligi úshin jetkiziletin suıyq gaz kólemin arttyrý, elektr energııasyn eksporttaý jaǵdaıy, geologııalyq barlaý jumystaryn kúsheıtý jónindegi josparlar, sondaı-aq tutyný naryǵyndaǵy kúrdeli konıýnktýraǵa baılanysty ýran óndirý kólemin azaıtý prespektıvalary týraly baıandady. Elbasy kezdesý qorytyndysy boıynsha birqatar naqty tapsyrma berdi.