Braıl qarpimen basatyn baspahana nege joq?

Elý jylǵa jýyq múmkindigi shekteýli azamattarǵa qyzmet kórsetip kele jatqan Semeı qalasyndaǵy arnaıy kitaphana búgingi tańda zaman talaptaryna saı jabdyqtalyp, óz oqyrmandaryna jan-jaqty mádenı-tanymdyq, aǵartýshylyq, ádistemelik, aqparattyq baǵytta qyzmet kórsetip keledi. Kedeılerin jebep, múgedekterine shynaıy qamqorlyq kórsetý qazaq halqy úshin adamı paryzdyń basty belgisi sanalǵan jáne sanalady da. Álemdik órkenıettilik uǵymynda bul tolyqqandy memlekettiliktiń belgisi bolyp tabylady. Elbasy N.Nazarbaev barlyq múmkindigi shekteýli jandar da qoǵam ómirine belsendi aralasýyna jaǵdaı jasaý qajettigin aıtqan bolatyn. Birikken Ulttar Uıymynyń Bas Assambleıasy 2006 jylǵy 13 jeltoqsanda Nıý-Iorkte qabyldaǵan «Múgedekterdiń quqyqtary týraly» konvensııasy aıasynda elimizde múmkindigi shekteýli jandardyń quqyǵyn qorǵaý tóńiregindegi zańna­manyń saqtalýy jiti nazarǵa alyndy. Semeı qalasyndaǵy zaǵıp jáne kózderi nashar kóretin azamattarǵa arnalǵan kitaphanada «Braılıst», «Syr sandyq», «Daýystap oqý», «Lıngafondy oqý zaly» atty úıirmeler jumys isteıdi. Sonyń ishindegi «Braılıst» úıirmesi 2013 jyly mádenıet jáne tilderdi damytý bóliminiń nusqaýy boıynsha ashylyp, braılıst mamanǵa bir shtattyq birlik bólindi. Braıl júıesi ýaqyt synynan ótip, adamzattyń oılap shyǵarǵan úlken jetistikteriniń biri bolyp tabylady. Oqyp, jazyp úırengen adam ádebıetke, mýzykaǵa, mádenıetke, ǵylymǵa qyzyǵyp izdenedi, qyzmet isteıdi jáne ómirde óz ornyn tabady. «Braılıst» úıirmesiniń jetek­shisi Arman Jakpelovanyń aıtýyn­sha, úıirme zaǵıp jandardyń bilim deńgeıin, saýattylyǵyn joǵa­rylatyp qana qoımaı, ońaltý qyz­metin de kórsetedi. Aıta ketsek, zaǵıp adamnyń qoǵamda, turǵylyqty jaǵdaılarda beıimdelýi asa mańyzdy problemalardyń biri. Úıirmede olarǵa «aq taıaqtyń» kóme­gimen baǵyt-baǵdar tabýǵa, ıne-jip sabaq­taýǵa, kez kelgen turmystyq tehnıkany paıdalanýǵa, qaýipsizdik erejelerin saqtaýǵa úıretedi. Mundaı keńester ásirese aıaq astynan kórmeı qalǵan azamattarǵa úlken septigin tıgizýde. Alǵash ashylǵanda jeti qa­tysýshysy bar úıirmege qazir on eki zaǵıp adam keledi. Árıne, kitap­hana qyzmet­kerleri úıirme q­aty­sýshylary kóbeı­genin qalamaıdy. Qazirgi ýaqytta jer sharynda zaǵıp adamdar sany 39 mıllıondy quraıdy. Al, 124 mıllıon adam nashar kóretinder qataryna jatady. Sarapshylardyń aıtýy boıynsha, on jyl ishinde bul kórsetkish 75 mıllıonǵa kóbeımek. Ǵalymdar óz kezeginde zaǵıptar men kózderi nashar kóretin adamdar qatarynyń ósýin eń aldymen kózge salmaq túsýden deıdi. Onyń birden-bir sebebi, tehnıkalyq gadjet­terdiń ár alýandylyǵy jáne kúnara kóbeıýi. Osyǵan oraı, Dúnıejúzilik densaýlyq saqtaý uıymy kóz jana­rynyń saqtalýyn bala kezden qolǵa alý kerektigin usynady. Qalamyzdaǵy arnaıy kitapha­nanyń 928 turaqty oqyrmany bar. Olar aýa raıynyń sýyǵyna, ystyǵyna qaramaı kitaphanaǵa kelip, mádenı sharalarǵa únemi qatysyp otyrady. Oqyrmandarǵa ártúrli janrda jazylǵan kitaptar usynylady. Jalpy kitap qory – 44860. Al braıl qarpimen jazylǵan kitap sany – 8900. Onyń ishinde 651 kitap qana qazaq tilinde. Kitaptar Reseı Federasııasynyń Máskeý, Sankt-Peterbýrg qalalarynan tapsyrys arqyly alynady. Kitaphana ujymyn elimizde bederli-núkteli qarippen kitap nemese merzimdi basylym shyǵaratyn arnaıy baspahana joqtyǵy alańdatýda. Oqyrmandar arasynda halqymyzdyń salt-dástúri, tól tarıhy, uly tulǵalar týraly jazylǵan qazaq tilindegi kitaptar úlken suranysqa ıe. Osy oraıda, elimizdegi beldi baspahanalarǵa osy máseleni qolǵa alý oryndy bolar edi. Anar QÝANǴALIEVA, Semeı qalasynyń mádenıet jáne tilderdi damytý bóliminiń bas mamany