Rıkkı Hatton: Jaqııanov – meniń maqtanyshym

WBA jáne IBO nusqalary boıynsha jeńil salmaqta álem chempıony Janat Jaqııanovtyń bapkeri Rıkkı Hatton birer kún buryn ótken jekpe-jek jaıly oı bólisti. Bul týraly sports.kz habarlady. «Janat – meniń maqtanyshym! Ekeýimizdiń jattyǵyp júrgenimizge birneshe jyldyń júzi ótti. Onyń chempıondyq ataqqa qol jetkizetinine senimim mol boldy. Bul meniń Konstantın Szıýge qarsy aıqasym sııaqty órbidi. O bastan-aq, Ýorrendi jyldamdyǵy men talantynyń arqasynda jeńbeıtinin ári alǵashqy raýndtarda ese jiberetinin bilgen edim. Biraq qarqynynan taımaı, osal tustaryn ózine tıimdi paıdalanyp, laıyqty jeńiske jetti. Birinshi raýndta bolǵan jaıtqa biz qarsy eshnárse isteı almadyq, alaıda, budan keıin qoldanǵan taktıkamyz júzege asqanyna qýanyshtymyn. Chempıondarǵa laıyqty judyryqtasqanynyń arqasynda mine, tıtýldaryna qol jetkizdi», – dedi Hatton. «Boksshylyq ǵumyrymda tórt dúrkin chempıon bolǵan edim, mine, endi chempıonnyń bapkeri ári promoýteri bolyp otyrmyn. Mundaı dárejege jetý kez kelgenniń qolynan kele bermeıdi. Komandamyzda Maık Djekson jáne Bleın Iýnıs sekildi maıtalmandar bar. Kóp uzamaı olar da chempıon atanady dep úmittenemin», – dedi Jaqııanovtyń jattyqtyrýshysy.