Jańa mindet júktedi

Keshe Qaraǵandy oblysyna jumys saparymen kelgen Memleket basshysy Nursultan Nazarbaev ob­lys aktıvimen óńirdiń áleýmettik-ekonomıkalyq damý máseleleri jóninde keńes ótkizdi. Jıynda Elbasy oblystyq más­lıhattyń depýtattary kan­dıdatýrasyn maqul­daǵan óńirdiń jańa ákimi Erlan Qoshanovty tanys­tyrdy. Al eks-ákim Nur­mu­hambet Ábdibekov Elba­synyń Jarlyǵymen Esep komıtetiniń tóraǵasy bo­lyp taǵaıyndaldy. Nursultan Nazarbaev jıynǵa qatysýshylarǵa arnaǵan sózinde elimizdiń jáne Qaraǵandy obly­synyń ekonomıkalyq jáne áleý­mettik damý kórsetkishterine toq­talyp ótti. Sóz basynda Elbasy: − Men búgin konstıtýsııalyq mıssııany oryndaýǵa keldim. Máslıhatqa jańa ákim Erlan Qoshanovtyń kandıdatýrasyn usyndym. Ol ózi – qaraǵandylyq. Túrli laýazymdarda jumys istegen. Onyń tájirıbesi Qara­ǵan­dy ​​oblysynyń túıtkildi máse­lelerin sheshýge kómektesedi dep úmittenemin, – dedi. Sonymen qatar, Memleket bas­shysy buǵan deıin oblys ákimi bolǵan Nurmuhambet Ábdi­bekovke alǵysyn bildirip, jańa qyzmetine sáttilik tiledi. Atalǵan jıynda el Pre­zı­denti Qaraǵandy ​​oblysynyń basymdyqtaryn belgilep, mem­le­ketti odan ári damytýǵa qa­tys­ty jańa mindetterdi atap ótti. – Táýelsizdik alǵannan beri bul óńirdiń ekonomıkasy 23 ese ósti, ındýstrııalandyrýdyń 72 nysany iske qosyldy. Oblysqa sońǵy 5 jylda 1,7 trıllıon teńge ınvestısııa salyndy. Apat­ty jaǵdaıdaǵy mektepter joıylyp, úsh aýysymmen bilim berý máselesi sheshilýde. Jol kartasy aıasynda 4 myńnan astam adam jumyspen qamtyldy, – dedi Memleket basshysy. Qazaqstan Prezıdenti eldegi saıası reformalar úderisine erekshe nazar aýdaryp, prezı­dent­tik vertıkaldi saqtaýdyń aspektileriniń jáne memlekettik bıliktiń barlyq tarmaǵynyń jaýapkershiligin arttyrýdyń mańyz­dylyǵyn atap ótti. Son­daı-aq, birqatar ózekti mindet­terdi oryndaý qajettigin aıtyp, oblys turǵyndaryn eldiń ekono­mıkalyq jańǵyrýyna belsene atsalysýǵa shaqyrdy. – Investısııa tartý úshin qolaıly jaǵdaı týǵyzý kerek. Qazaqstan Dúnıejúzilik bank reıtınginiń «Bıznes júrgizý jeńildigi» krıterııi boıynsha 35-oryndy ıelenip otyr. Bul – jaqsy kórsetkish, alaıda bizge eń áýeli óńirlerdegi jumysty jalǵastyrý qajet. Biz bıznes júrgizý jeńildigi boıyn­sha oblystardyń arnaýly reıtın­gin jasap, jyl saıyn ındýs­trııalandyrý kúni tabys etiletin ataýly syılyq taǵaıyndaımyz, – dedi Nursultan Nazarbaev. Sonymen birge, Memleket basshysy kásipkerlik aıasyn ke­ńeıtý, memleket-jekemenshik árip­testigin damytý, aýyl sharýa­shylyǵyn sýbsıdııalaý, «Nur­ly jer» baǵdarlamasyn iske asyrý, óndiriletin ónimdegi qazaq­standyq úlesti arttyrý, son­daı-aq ǵylymı-zertteý ınstı­týttaryn qatystyrý arqy­ly ónerkásip sektoryn ınno­va­sııalyq turǵydan damytý shara­laryna nazar aýdardy. – Biz báse­kege qabiletti eks­porttyq kásip­oryndarǵa negizdelgen ındýs­trııalan­dyrýdy jal­ǵas­tyrýǵa tıispiz. Taýar jetkizý, qyz­met kórsetý jáne olardy tutyný jó­ninen jahandyq júıe­den or­nymyzdy tabýymyz qajet. Bul maqsatqa transulttyq kom­panııalardy tartý arqyly qol jetkize alamyz, – dedi Qazaqstan Prezıdenti. Nursultan Nazarbaev ákim­der men damý ınstıtýttary bas­shylarynyń aldyna otandyq kásiporyndardy odan ári damytý úshin ınvestorlarmen jumysty jandandyrý mindetin qoıyp, sóziniń sońynda «Úshinshi jań­­ǵyrý – bul barlyq ákim­dik­ter úshin, búkil memleket úshin kún tártibindegi basty máse­le. О́tken jyly Qaraǵandy ​​obly­syna quıylǵan ınvestısııa 12 paıyzǵa tómendegen. Oblysta kásipkerlikti damytýdy, senimdi basqarý men qyzmet kórsetý keli­simsharttaryn qolǵa alý kerek. Qaraǵandy ​​– elimizdiń ekono­mıkalyq damýynyń basty qozǵaltqyshy», − dedi. Jıyn sońynda Qaraǵandy oblysynyń jańa taǵaıyndalǵan ákimi Erlan Qoshanov Qazaqstan hal­qy men el Prezıdentine ant berdi. Mıras ASAN, «Egemen Qazaqstan» QARAǴANDY