Jýyrda M.Áýezov atyndaǵy Ońtústik Qazaqstan memlekettik ýnıversıtetiniń stýdenti Sabına Áshirbaeva kórkem gımnastıkadan «Miss Valentine» halyqaralyq týrnırinde altyn medalǵa ıe boldy. Estonııanyń Tartý qalasynda ótken básekege álemniń bolashaǵynan mol úmit kúttirgen sheber gımnasshylary qatysqan bolatyn.
Kórkem gımnastıkamen bes jasynan bastap aınalysyp kele jatqan Sabınanyń bul alǵashqy jeńisi emes, árıne. Búginde aty álemge tanyla bastaǵan gımnasshy Sabınanyń sportqa áýestigi áýel basta Álııa Júsipovany maqtan tutýdan, soǵan elikteýden bastalǵan eken.
Gımnastıkaǵa degen qyzyǵýshylyǵyn baıqaǵan əkesi bes jasar Sabınany Shymkenttegi kórkem gımnastıka úıirmesine ózi jetelep aparypty. On jasqa deıin alǵashqy bapkeri Olga Smırnovanyń tobynda, kileń ózinen úlken qyzdarmen jattyqqan. Topta eń kishisi bolǵanyna qaramastan, ózin qalaı da kórsetýge tyrysqan ol kóptiń arasynda eleýsiz qalǵysy kelmeı eńbektendi. Sportqa jaqyn otbasynda dúnıege kelgen qyzdyń ynta-talpynysy ata-anasy tarapynan árdaıym qoldaý taýyp otyrdy. Hobbı emes, ómirindegi basty nərse ekenin de erte uǵynǵan Sabına kórkem gımnastıkaǵa óner, súıip aınalysatyn isi retinde qarapty.
Joǵary nətıjelerge jetý úshin aldyna úlken-úlken maqsattar qoıdy. Ol maqsattarǵa jetý jolynda bapkerlerimen birge ter tókti. Bul oraıda, kórkem gımnastıka sheberi Əlııa Júsipovamen birge jumys istegen jeti jylǵa jýyq ýaqyttyń bergeni mol. Mysaly, Sabına 12 jasynda Ulttyq quramaǵa qabyldandy, 15 jasynda kórkem gımnastıkadan sport sheberi atandy. Ile-shala «Halyqaralyq dərejedegi sport sheberi» normatıvin oryndap, mundaı ataqqa 15 jasynda qol jetkizgen tuńǵysh sportshy atandy. Bul oraıda ol jeke bapkeri Álııa Júsipovadan ozyp otyr. Álııa bul belesti 17 jasynda baǵyndyrǵan bolatyn.
Sabına 2014 jyly Inchhonda ótken Azııa oıyndarynda komandalyq jarysta qola aldy. 2015 jyly alǵash ret Azııa chempıonatyna qatysty. Jekeleı ónerde eki qola utty. Komandalyq esepte de qola medaldy ıelendi. Sol jyly Lıýksembýrgte ótken halyqaralyq týrnırde bir altyn, bir kúmis oljalady. Odan keıin Əlem chempıonatynda 18-orynnan kórindi. Ekinshi ret Azııa chempıonatyna qatysyp, eki qola, eki kúmis medal aldy.
– Kórkem gımnastıka maqtanyshy Əlııa Júsipova – jeke bapkerim. Afıny, Beıjiń olımpıadalarynda qazaq kórkem gımnastıkasyn əlemge moıyndatqan sportshy shákirtterine bapkerlik kózqaraspen ǵana emes, gımnast turǵysynan da qaraıdy. Sol sebepti de, ol kisi bərin túsinedi. Keı kúnderi sharshap, mazań bolmaı turady. Jattyǵý barysynda bir jerińdi aýyrtyp alatyn jaǵdaılar da kezdesedi. Ondaı kezde Əlııa Maqsutqyzy sporttyq jolynda basynan ótken jaǵdaılardy aıtyp, kóńilińdi kóterip, tipti qanattandyryp jiberedi. Jarystarda jaqsy nətıje kórsetseń, «Keleside sen myna bıikti de baǵyndyra alasyń», dep senimińdi oıatady. Bir sózben aıtqanda, bir-birimizdiń jaı-kúıimizdi óte jaqsy sezinemiz. Bul jattyǵý barysyna kóp kómektesedi. Rıoda óner kórsetýge alańǵa shyqqanda alǵashqyda tolqydym. Basymda san oı sapyrylysyp ketti. Biraq, dereý artyq oılardy ysyryp tastap, kóńilimdi tynyshtandyra aldym. «Osy ýaqytqa deıin úırengenimdi, bar qabiletimdi kórsetemin» degen maqsatty ǵana alǵa qoıdym. Sońymda bapkerim, dostarym, búkil el turǵanyn sezindim. 24 elden barǵan 26 gımnasshynyń arasynda 12-oryn aldym. Bul da jaqsy kórsetkish. О́ıtkeni, maǵan qaraǵanda təjirıbeli, tanymal sportshylardyń ózi menen keıingi oryndarda qaldy. Qytaılyq arý Chang Rong ekeýmiz gımnasshylardyń arasynda eń jasy bolǵanymyzdy da aıta keteıin. Kelesi Olımpıadada úzdik ondyqqa, tipti, úzdik bestikke kiremin dep oılaımyn. Olımpıadadan kelgen soń maǵan M.Əýezov atyndaǵy Ońtústik Qazaqstan memlekettik ýnıversıtetiniń «Deneshynyqtyrý jəne sport» mamandyǵyna ýnıversıtettiń bilim granty berildi. Qazir sonda oqyp júrmin», – deıdi Sabına Áshirbaeva.
Osy arada aıta ketelik, oqý ornynda salamatty ómir saltyn ustanýǵa, sportpen aınalysýǵa erekshe mán berilip keledi. Jalpy, el namysyn qorǵap, álemdik arenalarda, Olımpıada oıyndarynda kók týymyzdy jelbiretken jeńimpazdardyń arasynda osy joǵary oqý ornyndaǵy deneshynyqtyrý jáne sport fakýltetinde oqyǵan jáne bilim alyp júrgen qyzdar kóp. Kúni keshe Almatyda ótken HHVIII qysqy Ýnıversıadada frıstaıldan júldeli orynnan kóringen Janbota Aldabergenova osy oqý ornynda oqydy. Aýyr atletıkadan Rıo Olımpıadasynyń kúmis júldegeri atanǵan Jazıra Japparqul da M.Áýezov atyndaǵy OQMÝ-dyń stýdenti. Áıgili gımnasshy, Azııanyń birneshe dúrkin chempıony, eki birdeı Olımpıadaǵa qatysqan Álııa Júsipova, 2008 jylǵy Beıjiń Olımpıadasynyń qola júldegeri atanǵan Elena Shalygına, ziltemirshiler Tatıana Hromova, dzıýdoshy Aleksandra Podrıadova, jeńil atlet Tatıana Bocharova, mergen Olga Dovgýn, samboshy Perızat Jaqypbekova... oqý ornynyń tanymal talanttar tizimi osylaı jalǵasa beredi. Álemge áıgili sportshylardyń jeńisti joldaryn jalǵastyra Rıo tórindegi baıraqty básekege qatysqan kórkem gımnasshy Sabına Áshirbaeva men Selına Jumataeva búginde atalǵan oqý ornynda bilim alýda.
Daryndy sportshylardy qoldaý maqsatynda jyl saıyn oqý ornyndaǵy ǵylymı keńestiń sheshimimen ýnıversıtet granty bólinedi. Bolashaq jeńimpazdardyń jattyǵýyna, sheberligin shyńdaýǵa barlyq jaǵdaı jasalǵan. Jarysqa, oqý-jattyǵý jıyndaryna qatysýshylar úshin synaq tapsyrýdyń, sabaqtyń tıimdi kestesi jasalǵan. Jalpy, M.Áýezov atyndaǵy OQMÝ-dy biliktilikpen basqaryp kele jatqan rektor Jumahan Mirhalyqovtyń sportqa aıryqsha kóńil bóletini elge málim. Onyń talantty jastarǵa barynsha qamqorlyq tanytyp, qoldaý kórsetýiniń arqasynda ýnıversıtettiń stýdentteri talaı bıikterdi baǵyndyryp keledi. Irgeli bilim ordasy olımpııa oıyndary, álem birinshilikterinde top jarǵan stýdentterin maqtan tutady. Osyndaı qoldaý men qamqorlyqtan keıin stýdentter de alańsyz jattyǵyp, túrli deńgeıdegi jarystarda jeńimpazdar qatarynan kórinýde.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
