Fransııa prokýratýrasy memleket prezıdenttigine kandıdattardyń biri Fransýa Fııonǵa qarsy qylmystyq is qozǵalǵanyn habarlady, dep jazady VVS. Ol fransýz parlamentinde depýtat bolǵan kezde óz otbasy múshelerine zańsyz eńbekaqy tólegen dep aıyptalýda. Vedomstvonyń habarlaýynsha, Fııonǵa memlekettiń qarajatyn jumsady degen aıyp taǵylǵan. Fııonnyń qorǵaýshysy bul aqparatty resmı túrde rastady.
Fııon óziniń áıelin jumysqa ornalastyryp, oǵan eńbekaqy tólegen. Biraq is júzinde ol esh qyzmet atqarmaǵan. 1986 - 2013 jyldar aralyǵynda Penelop jalaqy retinde memleket bıýdjetinen júzdegen myń eýro alǵan. Fransııanyń Le Canard enchaîné basylymy habarlaǵandaı, Penelop Fııon parlamenttegi kúıeýiniń kómekshisi retinde 500 myń eýro paıda tapqan. Fransııa zańy boıynsha kómekshi retinde otbasy múshelerin qabyldaýǵa tyıym salynbaǵan. Biraq Penelop Fııonǵa óte kóp mólsherde jalaqy belgilengen, sonymen qatar ol 2012-2013 jyldar aralyǵynda kúıeýiniń dosy Mark Ladre de Lasharer atty kásipkerdiń jýrnalynan da aıyna 3,5 myń eýro alyp otyrǵan. Fııon ózine taǵylyp otyrǵan aıyptarmen kelispeıtinin aıtty. Esterińizge sala ketsek, Fransııadaǵy prezıdenttik saılaýdyń alǵashqy kezeńi 23 sáýirde ótedi. Fııonnan basqa prezıdenttikke Emanýel Makron men Marın Le Pen úmitker. Osy daýdan keıin alǵashqy orynda kele jatqan Fransýa Fııon qazir úshinshi orynda tur.
