Ekonomıka máselelerin sarapshylar qadaǵalaıdy

Elimizdiń úzdik sarapshylary ekonomıkalyq belsendiliktiń damý joldaryn qarastyrady, dep jazady palata.kz. Sarapshylardyń alǵashqy ashyq alańynda jańa jaǵdaıdaǵy ekonomıkanyń jańǵyrýynyń bolashaq qadamdaryn talqylanatyn bolady. Qazaqstan Respýblıkasynyń ekonomıkasy jónindegi sarapshylar keńesi Qazaqstan Respýblıkasy Premer-mınıstriniń 2016 jyldyń 6 jeltoqsanyndaǵy jarlyǵymen bekitilgen. Bul ­– ekonomıka salasyn damytý jolyndaǵy aqyl-keńester men usynystardy súzgiden ótkizip, qorytý maqsatynda qurylǵan keńesshi organ. QR ekonomıkasy jónindegi sarapshylar keńesi quramy qoǵamnyń túrli salasynda qyzmet etetin, aıtatyn oıy men ózindik orny bar tulǵalardan jasaqtalǵan. Keńes quramynda Eldar Ábdirazaqov, Jaras Ahmetov, Ánýar Boranbaev, Erbolat Dosaev,  Jannat Ertilesova, Oraz Jandosov,  Qaırat Kelimbetov, Erlan Qarın, Jaqsylyq Qulekeev, Abylaı Myrzahmetov, Merýert Mahmutova, Serjan Mádıev, Oljas Hýdaıbergenov, Úmit Shaıahmetova bar. QR ekonomıkasy jónindegi sarapshylar keńesiniń atqarar qyzmeti jan-jaqty bolmaq. Damý qarqyny jaqsy salalarda memlekettiń baqylaýymen qatar alqaly toptar men keńesterdiń jumysy esepke alynady. Ekonomıkada oryn alǵan máselelerdi der kezinde sheship, halyqtyń muń-muqtajyn nazarda ustap, óz usynystaryn ortaǵa salatyn, oı eleginen ótkizip, sheshý joldaryn talqylaıtyn el aǵalarynyń oıy mańyzdy. Sarapshylar keńesi eń ózekti máselerdi talqylaý úshin aıyna bir ret bas qosady. Bıylǵy jyldyń naýryz aıynda Keńestiń 3 otyrysy ótkizildi. Onda densaýlyq saqtaý, bank júıesi jáne ekonomıkanyń negizgi salalarynyń básekege tózimdiligi, memlekettik óńirlik saıasaty  boıynsha máseleler talqylandy. Atalǵan baǵyttar boıynsha sarapshylar óz usynystary men pikirlerin bildiredi. Aldaǵy ýaqytta bul keńestiń jumysy týraly aqparat «Atameken» UKP saıtynda jáne Qazaqstan ekonomıster qaýymdastyǵy saıtynda http://www.economist.kz/ turaqty túrde jarııalanady. Keńestiń jumysy qoǵamǵa ashyq túrde kórsetiledi. Keńes turaly tolyq aqparatty «Atameken» UKP saıtynda, QR ekonomıkasy jónindegi sarapshylar keńesi paraqshasynan bilýge bolady.