Qostanaı aýdanyndaǵy Áljan aýylynda turatyn Nurlan men Gúljaýhar Tólegenovter óziniń bir ulynan basqa túrli ulttyń segiz balasyn baýyryna basty. Olar osy aýyldaǵy kishkentaı qorjyn úıde turyp jatty. Balalarǵa ol tarlyq etetin. Biraq joqtan bar jasap úırengen otanasy «kóńilimiz keń bolsa jarar» dep eshkimniń aldyna alaqan jaıyp barǵan joq.
Kóp balaly otbasynyń jaǵdaıyn kórgen Gúljaýhardyń mekteptegi ustaz áriptesteri osydan úsh jyl buryn olarǵa asarlatyp úı salyp berýge bastama kótergen bolatyn. Sóıtip, aýdan ustazdary qarjy jınaǵan edi. Biraq olar jınaǵan 5 mıllıon teńge úı salýǵa jetpedi, ári muǵalimder jaldaǵan qurylys brıgadasy úı qurylysynda qate jiberip, ol toqtap qalǵan bolatyn. Sondyqtan Tólegenovter otbasy úıiniń qurylysyn aıaqtaýdy Qazaqstan halqy oblystyq assambleıasy qolǵa alǵan edi.
Otbasylyq balalar úıi úshin oblystaǵy barlyq ulttyń ókilderi jylý jınady. Koreı ulttyq-mádenı ortalyǵynyń tóraǵasy, belgili kásipker, «BK-STROI» qurylys kompanııasynyń jetekshisi Igor Kım kottedjdiń qurylysyn aıaqtaýdy qolyna alǵan edi, ol jaqynda otbasyna úıdiń kiltin berdi. Tólegenovter otbasy eki qabatty záýlim úıge kóship, qonys toıyn toılady.
«Nurlan men Gúljaýhar óte saýapty is istep otyr. Men Gúljaýhardyń meıirimdiligi men adamgershiligine tańqalamyn. Balalardyń barlyǵyn keremet tárbıelep otyr, olar sportpen, mýzykamen aınalysady. Al olardyń jasap otyrǵan isiniń qasynda bizdiki sál kómek qana. Barlyq jurt bolyp bul qaıyrymdylyq isten shet qalmady. Endi biz osy otbasyna turaqty kómek berip turatyn bolamyz, kóktemde úıdiń aınalasyn retke keltiremiz, baý-baqsha egetin bolamyz». - dedi Igor Romanovıch. Jurtshylyq, demeýshiler kelip, otbasynyń jańa qonysyna qutty bolsyn aıtty.
Názıra Járimbetova,
"Egemen Qazaqstan".
Qostanaı oblysy
