Eńbek naryǵynyń ortaq aqparattyq bazasy qurylady

Ol úshin Densaýlyq saqtaý jáne áleýmettik damý mınıstrliginiń qazir jumys istep turǵan enbek.kz platformasynyń bazasy qoldanylady. Bul týraly búgin Premer-Mınıstr B.Saǵyntaevtyń tóraǵalyǵymen ótken QR Úkimetiniń kezekti otyrysynda Densaýlyq saqtaý jáne áleýmettik damý mınıstri Tamara Dúısenova málimdedi. «Baǵdarlamanyń úshinshi baǵytynda azamattardyń jeke tobyn mekenjaılyq qoldaýdy, eńbek resýrstarynyń jedeldigin arttyrý men eńbek naryǵynyń ınfraqurylymyn damytýdy kúsheıtý qarastyrylady», – dep atap ótti vedomstvo basshysy. Mınıstrdiń aıtýynsha, búginde elimizde halyqty jumyspen qamtýǵa yqpal etetin onnan astam veb-saıt bar. Degenmen, eńbek naryǵyndaǵy suranys pen usynystardyń barlyǵyn biriktiretin ortaq portal joq. Osyǵan baılanysty jumys izdeý men qyzmetkerlerdi irikteýge arnalǵan Eńbek naryǵynyń biryńǵaı aqparattyq bazasyn nemese Eńbek bırjasyn qurý usynylyp otyr. Bul jumysty enbek.kz platformasynyń bazasynda júzege asyrý josparlanǵan. Eńbek bırjasynda áleýmettik-eńbek salasynyń birtutas júıesi, memlekettik organdardyń aqparattyq júıesi, jeke jumyspen qamtý agenttikteriniń derekter bazasy, jumyspen qamtý jónindegi ınternet portaldar biriktiriletin bolady. Oǵan aımaqtardyń jumyspen qamtý ortalyqtary qosylady, sóıtip jumyspen qamtý boıynsha kórsetiletin qyzmet múmkindikteri keńeıedi. Mınıstr aıtyp ótkendeı, jekeleı azamattar tobyn eńbekpen qamtýdaǵy mekenjaılyq qoldaý kezinde «Jumyspen qamtý 2020» jol kartasy baǵdarlamasynda qoldanylǵan tetikter paıdalanylatyn bolady. Atap aıtqanda, jastar arasynda, sonymen qatar áıelder men múmkindigi shekteýli jandar arasynda joǵary suranysqa ıe jastar tájirıbesi men áleýmettik jumys oryndary, qoǵamdyq jumystar qoldanylady. Arnur ASQAR, «Egemen Qazaqstan»