"Aqtastaǵy Ahıko" Astanada qoıylyp jatyr

Astanadaǵy Beıbitshilik pen kelisim saraıynda «Aqtastaǵy Ahıko» dramasynyń premerasy bastaldy. Oǵan dramadaǵy bas keıipkerdiń túptulǵasy Ahıko aqsaqal arnaıy keldi. Sondaı-aq premeraǵa QR Mádenıet jáne sport mınıstri Arystanbek Muhamedıuly men QR Memlekettik hatshysy Gúlshara Ábdiqalyqova qatysýda, dep habarlaıdy QazAqparat. Spektaklge japon uly Ahıkonyń qıly taǵdyry arqaý bolǵan. Ol Keńes úkimeti kezinde stalındik qýǵyn-súrginge ushyrap, 15 jasynda jazyqsyzdan jazyqsyz ataqty «Qarlag» túrmesine túsken. Jastyq shaǵynyń 10 jylyn azappen ótkizip, ólimshi halde túrmeden shyqqan soń ol qazaq anasynyń arqasynda aman qalady. Osylaı Qaraǵandy mańyndaǵy Aqtas qalasynda turaqtap, qonystanyp qalady. Keıin Ahıko óz Otanyna shaqyrtý alady, biraq onda kóp turaqtamaı, Qazaqstanǵa qaıtyp oralady. Qazir Ahıko aqsaqal 85 jasta. 11 nemere, 5 shóbere súıip, úlken áýlettiń basy bolyp otyr. Ahıko Tesýronyń taǵdyr joly - stalındik zulmat jyldarda Qazaqstanǵa qonys aýdarǵan, aıdalyp, jazyqsyz sottalyp lagerlerge ákelingen myńdaǵan adamdardyń, túrli ult ókilderiniń taǵdyry. Qoıylymda Ahıkonyń taǵdyry arqyly HH ǵasyrdaǵy eń aýyr kezeńde, azap lagerlerinde otyryp, óziniń adamı beınesin saqtap qalǵan rýhy myqty, jasampaz jandardyń jıyntyq beınesi jasalǵan. Aıta keteıik, Qazaqstannyń teatr keńistiginde tuńǵysh ret kózi tiri saıası qýǵyn-súrgin qurbanynyń taǵdyry derekti dramaǵa arqaý bolyp otyr.  Qazaqstannyń eńbek sińirgen qaıratkeri, rejısser Ashat Maemırov sahnalaǵan bul qoıylym M.Áýezov atyndaǵy qazaq memlekettik akademııalyq drama teatry ujymynyń Qazaqstan Respýblıkasynyń Táýelsizdiginiń 25 jyldyǵyna arnaǵan úlken jobasy. Basty róldi teatr akteri Dýlyǵa Aqmolda somdaıdy. Sondaı-aq qoıylymda Qazaqstannyń eńbek sińirgen qaıratkeri Bekjan Turys (Aqaıdyń Qaseni), Qazaqstannyń eńbek sińirgen qaıratkeri Qýandyq Qystyqbaev, Qazaqstannyń eńbek sińirgen qaıratkeri, Qazaqstan Jastar odaǵy syılyǵynyń laýreaty Azamat Satybaldy (Stepan) syndy tanymal ártister oınaıdy.