400 myń túp raýshan Reseıge eksporttaldy

Ekibastuzda raýshan gúlderiniń 400 myń túbi Reseıge eksporttaldy, dep habarlady pavlodarnews.kz. Jylyjaı kesheniniń dırektory Aımaǵanbet Sársenbekulynyń aıtýynsha, qazir bul jerde aıyna 600 myń túp gúl alynady. Onyń 60 paıyzy sońǵy eki aıdan beri Reseı eline jetkizile bastaǵan. Ásirese, Máskeý, Krasnodar, Omby, Novosibir aımaqtarynan suranys kóp. «Tapsyrys berýshilerdi eń aldymen, gúldiń uzaq ýaqytqa saqtalý qasıeti men tıimdi baǵasy qyzyqtyrady. Qazaqstan boıynsha gúl naryǵyn jaýlap aldyq desek bolady. Batys óńirlerden basqa, Ońtústik, Soltústik, Ortalyq Qazaqstandy osy raýshan gúldermen qamtımyz. Alaıda Batys Qazaqstanǵa jetkizý ázirge qıynǵa soǵyp tur. Aldaǵy ýaqytta bul másele de sheshimin tabady. Qazir raýshan gúlderdiń qosymsha taǵy alty túrin otyrǵyzamyz. Bul – «avalanı», «bıkolor», «sherpa» ataýyna ıe qyzyl, aq, sary jáne aralas gúlder. Suranystyń artýyna baılanysty kelesi jyly taǵy 5 ga aýmaqqa keńeıý josparda bar. Qazir kásiporynda 70-ke tarta adam jumys isteıdi», – dedi ınvestor. Aıta keterligi, keshen bıyl aqpan aıynda iske qosylǵan. Jobaǵa 3,2 mlrd teńge ınvestısııa quıyldy. Gollandııalyq tehnologııamen salynǵan jylyjaıdyń aýmaǵy 5 ga quraıdy. Bolat Nurjanov atyndaǵy «Ekibastuz MAES – 1» JShS-niń janynda ashylǵan jylyjaı elektr qýatyn arzan baǵamen osy stansııadan alady. Gollandııalyq raýshan gúliniń 20-ǵa tarta túri arnaıy mıneraldy maqtada tamshylatyp sýarý tásilimen ósiriledi. Onyń ishinde «Red naomi» suryby joǵary suranysqa ıe.