– Jol tańdamaıtyn mashınanyń áli de jetildiretin tustary bar. Onyń keıin qýatyn molaıtyp, júk tıeıtin qorap jasaýymyzǵa bolady, al myna kúıinde ol ańǵa, balyq aýlaýǵa, tabıǵat aıasynda demalýǵa minýge jaraıdy, – deıdi Nıkolaı Evgenevıch.
Onyń aıtýynsha, jol tańdamaıtyn mashınany qurastyrý asa qıyn sharýa kórinbeıdi. Oǵan VAZ-2103, 2106, 2101 avtomobılderiniń bólshekteri negiz bolǵan. Shynjyr tabanynyń ishine osy mashınalardyń dońǵalaqtaryn, aldyńǵy jaǵyna «Jıgýlıdiń» dısksin salǵan. Kabınasynyń shynylary eski «Nıvadan», júrgizý bólikteriniń bólshekteri VAZ mashınasynan buıyrypty.
Nıkolaı Evgenevıch jumystan kelgen soń, túrli kitaptardy aqtarady, ınternetten izdeıdi, odan qaldy, azamat bolǵan eki uly da ákesiniń osy talpynysyna demeý bolady.
– Ákem úıde qarap otyrǵan emes. Qora-qopsydaǵy eńbekti qalaı jeńildetýdi oılaıdy da júredi. Biz qazir kartopty ákemniń qoldan qurastyrǵan qurylǵysyn paıdalanyp, tuqymdy traktormen bir mezgilde jerge sińirip shyǵamyz, – deıdi Nıkolaı Evgene-
vıchtiń kishi uly Nıkolaı.
Ákeli-balaly Bezbabnyılar qurastyrǵan tehnıkasyn naýryz aıynyń aıaǵynda «synaqtan» ótkizipti. Aýyl syrtyna shyǵyp, qar úıilgen joldarǵa salǵan.
– Eshqandaı kidirissiz jeńil óttik, rasynda, ákem qurastyrǵan mashınaǵa qandaı jol bolsa da báribir ekenin kórdik. Endi, kabınasyn sý kirmeıtindeı, shý ótpeıtindeı etip jetildirý, syrtyn boıap, árleý, modelge at berý sekildi jumystary qaldy, – deıdi kishi Nıkolaı Bezbabnyı.
Úlken Nıkolaı Bezbabnyı munymen toqtamaıtynyn aıtty. Ol «aýyldastardyń eńbegin jeńildetetin taǵy ne oılap tabýǵa bolady?» degen oıdyń jeteginde júr.
Názıra JÁRIMBETOVA,
«Egemen Qazaqstan»
Qostanaı oblysy,
Fedorov aýdany,
Shańdaq aýyly
