Qazaqstanda alǵash ret ótkizilgeli otyrǵan «Pıng-pong hanshaıymy» týrnıriniń alǵashqy irikteý oıyndary 3-28 shilde aralyǵynda Qazaqstannyń barlyq aımaqtarynda ótse, fınal oıyndary 22-24 tamyz aralyǵynda Almaty qalasynda ótpek. Týrnır qortyndysy boıynsha jeńimpaz atanǵandar Pekın qalasyndaǵy sport akademııasynyń jattyqtyrýshylarynan ústel tennısinen arnaıy sheberlik synybynan ótý múmkindigine ıe bolady.
Joba úılestirýshisi Maıra Áljanova óz sózinde: «Qorymyzdyń 13 jyldyq tarıhynda «Pıng-pong hanshaıymy» týrnıriniń qadam basýy barshamyzǵa kópten kútken bastama boldy. Balalar úıleriniń jas qyzdary úshin sportta, onyń ishinde, ústel tennısinde óz baqtaryn synap kórý arman ǵana emes, múmkindigi mol úlken joba da. Jarys jeńimpazdaryna Qytaı eline saıahattap qaıtýǵa múmkindik beretin bul jobanyń birden bir maqsaty – balalardyń sportqa degen qyzyǵýshylyǵyn yndalandyrý», dep atap ótti.
Osy oraıda, QHR Bas konsýldyǵy saıası bóliminiń basqarýshysy Chjan Sıaosın: «Bul týrnır ár balanyń jeke tulǵa retinde qalyptasýyna yqpal eteri sózsiz. Sebebi, balalardyń jeńiske degen zor talpynysy, senimi bar», dedi
«Biz osyndaı keremet týrnırdi uıymdastyryp otyrǵan «Baýyrjan» qoryn osyndaı jobaǵa at salysýǵa múmkindik bergenderine alǵys bildiremiz. Sport – keleshegi kemel is», – deı kele, «Hýaveı Teknolodjız Qazaqstan» JShS-niń qoǵammen baılanys bóliminiń basshysy Andreı Jeltıkov osyndaı maqsaty men bolashaǵy jarqyn jobalardy qoldaýǵa ázir ekendikterin bildirdi.
Sonymen qatar, týrnır uıymdastyrýshylary qazaqstandyq jastardyń sportqa degen qyzyǵýshylyqtaryn oıatý maqsatynda osy joba aıasynda elimizdiń túkpir-túkpirindegi 100 jetimder úıine 100 tennıs ústeli men jabdyqtaryn syıǵa tartpaq. Bir aı ishinde barlyq balalar úılerine ornatylyp shyǵatyn tennıs ústelderi arqyly balalar úıiniń tárbıelenýshileri olımpıadalyq sport túrine enetin ústel tennısin jete meńgerýge múmkindik almaq.
QR ústel tennısi federasııasynyń atqarýshy basshysy Málik Beısálıev týrnırdiń barlyq kezeńderiniń joǵarǵy deńgeıde ótýine atsalysatyndaryn, fınal oıyndaryna arnaıy zal daıyndalyp, kásibı tóreshilerdiń shaqyrtylǵanyn jetkizdi.
7-10 jas pen 11-15jas aralyǵy boıynsha eki kezeńmen ótetin týrnırdiń Almaty qalalyq «Nur Otan» partııasy tóraǵasynyń orynbasary Qaıym-Munar Tábeev irikteý oıyndarynyń basty nazarda bolatynyn aıta kele: «Nur Otan» partııasy barlyq ıgi bastamalardy qoldaýǵa tyrysady. О́z tarapymyzdan aqparattyq jáne ákimshilik qoldaý kórsetip barlyq aımaqtarda jańa tusaýy kesilgen jobanyń sátti ótýine óz yqpalymyzdy tıgizemiz», dedi.
Jetim balalar arasyndaǵy ústel tennısi daryndaryn taýyp, qazaqstandyq tennıs deńgeıiniń artýyna birshama úles qosýdy maqsat tutqan atalmysh týrnırdiń saltanatty ashylý rásimi Almaty oblysynyń №1 balalar úıine alǵashqy tennıs ústelin tabystaý rásimimen jalǵasty. Shara barysynda alǵashqy oıyn ótkizilip, bolashaq pıng-pong hanshaıymdary synaldy.
Mıra BAIBEK,
«Egemen Qazaqstan»
