Álemniń eń ozyq shógenshileri bas qosqan básekede «Astana Polo Club» komandasy «Munchin Gold Cup 2017» júıesi boıynsha synǵa túsip, Nıderland, Shveısarııa jáne Germanııa sekildi alpaýyt elderdi artta qaldyryp jeńis tuǵyrynan kórindi.
Al «Almaty Polo Club» komandasy «Munchin Gold Cup» saıysynda Nıderland, Shveısarııa, sondaı-aq, jarys ıeleri germanııalyqtardy shań qaptyryp, jarys jolynda dara shyqty.
«Bizge bul jeńis ońaılyqpen kelgen joq. Qarsylastarymyz óte myqty shógenshiler. Eýropa elderinde bul sport túri asa tanymal oıyn, biraq biz de des bermeımiz», deıdi «Almaty Polo Club» komandasynyń kapıtany Qýanysh Musabekov.
«Bul bizdiń halyqaralyq arenadaǵy birinshi jeńisimiz emes. Máselen, «Astana Polo Club» komandasy 2016 jyly Argentınanyń Lýhan qalasynda ótken halyqaralyq týrnırden I orynmen oralǵan bolatyn. Sondaı-aq, 2017 jyly Argentınadaǵy «Santa Catalina Summer Cup» jáne «Torneo Summer Polo Match» halyqaralyq týrnırlerde bizdiń komandalar sheteldik shógenshilerdi basyp ozyp, I orynnan kórindi. Bıyl óz elimizde ótken «Almaty Snow Polo Cup» halyqaralyq dodasynda da I oryn ózimizge buıyrdy. Al 2017 jyly Argentınanyń Lýhan qalasyndaǵy halyqaralyq saıysta «Almaty Polo Club» birinshi orynǵa shyǵyp, eń úzdik komandalardyń qataryna qosyldy. Mine, Mıýnhendegi jeńis te bizdiń enshimizde», deıdi Halyqaralyq shógen federasııasynyń birinshi vıse-prezıdenti Sársen Quranbek.
Álemdik arenada el mereıin ústem etken shógenshi jigitterdi biz de quttyqtap, jeńisti joldyń jalǵana berýin tileımiz.
Arman OKTIаBR,
«Egemen Qazaqstan»
