О́ńir basshysy bastaǵan zııaly top aldymen «Ana men bala» eskertkishine gúl shoqtaryn qoıdy. «Qasiret» memorıalyna jınalǵan qaýym náýbet jyldary qaza tapqandardy bir mınýt únsizdikpen eske aldy.
Oblys ákimi óz sózinde totalıtarlyq ozbyr saıasat júrgizgen qýdalaýdyń saldarynan qurban bolǵan azamattarymyzdyń túrmege qamalǵanyn, jazyqsyz jandardyń rýhyn ardaq tutý búgingi jáne keler urpaqqa júkteletin asyl mindet ekenin aıtty.
«1935-1938 jyldar aralyǵynda respýblıkamyzda 113 myń adam qýǵyn – súrginge ushyrap, 25 myń qazaq halqynyń jáne Qazaqstan jerinde meken etken basqa da ulttardyń aldyńǵy qatarly zııaly, kórnekti uldary jazyqsyz atyldy. Qasiretti jyldary Ońtústik Qazaqstan oblysy boıynsha 2500 adam “Halyq jaýy” dep atyldy»,- dedi oblys ákimi Janseıit Túımebaev.
Munan soń, minberge saıası qýǵyn-súrginge ushyraǵan Kenbaevtar áýletiniń urpaǵy Qaırat Býrahanov shyǵyp, zulmat zamannyń qıyndyqtaryn baıandady.
«Sol zulmat zamanda Kenbaevtar áýletiniń 10 azamaty jazyqsyzdan jazyqsyz sheıit boldy. Eki atamyz 1928 jyldary Shymkenttegi túrmede azappen, ashtyqpen óltirilse, qalǵan 8 atamyz jazyqsyz oqqa ushty»,- dedi qarııa.
Shara barysynda kópshilik qaýym zulmat zamannan syr shertetin teatrlandyrylǵan qoılymdy tamashalady.
Eske sala keteıik, 1935-1938 jyldar aralyǵynda elimizdiń birtýar azamattary jappaı qýǵyn-súrginge ushyrady. Keńes ókimeti halyqtarynyń 4 mıllıonnan astam azamaty saıası qýǵyn-súrgin men asharshylyqtyń qurbanyna aınaldy. Sol jyldary surapyl saıasattyń saldarynan 507 myń qarashaı, sheshen, 180 myń qyrym tatarlary men 110 myń polıaktar, taǵy da kóptegen ult ókilderi Ońtústik Qazaqstanǵa kúshtep jer aýdaryldy.
