Shara barysynda elimizdiń mádenıet jáne rýhanııat salasyna eńbegi sińgen bir top óner jáne ádebıet qaıratkerlerine oblys ákiminiń arnaıy syılyǵy tabys etildi.
Oblys ákiminiń qolynan syılyq alǵandardyń qatarynda jazýshy Ádihan Shilterhanov, aqyn-sazger, dramatýrg Israıl Saparbaı, ánshi Aqjol Meıirbekov, Nurlan О́nerbaev, Altynaı Jorabaeva syndy sańlaqtar bar.
«Ońtústik Qazaqstan oblysyndaǵy kásibı teatrlardyń sany 8-ge jetip, onda jyl saıyn 40-tan astam jańa spektakl sahnalanyp keledi. Osynyń ózi Ońtústik jurtshylyǵynyń shynaıy ónerge degen yqylas-peıilin tanytsa kerek. Jyl saıyn oblys ortalyǵynda «Teatr kóktemi» festıvali ótkiziledi. Barshańyzǵa mádenıet pen ónerge qyzmet etý jolynda zor densaýlyq, shabyt, jańa shyǵarmashylyq tabystar tileımin», dedi oblys ákimi Janseıit Qanseıituly mádenı sharada.
Kesh barysynda óńirimizdiń 8 ónerpazyna Qazaqstan Respýblıkasynyń Mádenıet jáne sport mınıstrliginiń «Mádenıet salasynyń úzdigi» tósbelgileri men oblys ákiminiń gramotalary tabystaldy. Sondaı-aq, «Túrkistan 2017 jyl – Túrki áleminiń mádenı astanasy» jylynyń saltanatty ashylýy men túrki áleminiń «Naýryznama» merekesin uıymdastyrýǵa atsalysqan shyǵarmashylyq ujymdarǵa oblys ákiminiń atynan alǵys hattar berildi.
Baqtııar TAIJAN,
«Egemen Qazaqstan»
