Almaty oblysynyń ákimi Amandyq Batalov bastaǵan delegasııa keshe Jeńis saıabaǵy, sáýlet-etnografııalyq jáne tabıǵı landshafttyq murajaı qoryǵynyń sol jaǵalaý kesheni, qalanyń ortalyǵyndaǵy úlken mýzykalyq sý burqaq pen shaharda salynyp jatqan «Nurly jol» saıabaǵynyń qurylysymen tanysyp, О́skemendegi abattandyrý jumystaryn kórdi. Sonymen qatar qonaqtar qaladaǵy ÚMZ, «Qazsınk» sekildi kásiporyndar men ońaltý ortalyǵy, O.Rypakova atyndaǵy jeńil atletıka ortalyǵyn tamashalady.
«Toǵyz qujatqa qol qoıyldy. Almaty oblysynyń kásipkerleri óńirdegi kásiporyndarmen tanysyp, múmkindikterin baǵamdady. Byltyr men Almaty oblysyna barǵanda birqatar iri nysandarda bolǵan edim. Qazirgi ýaqytta Semeıde «Abaı Arena» sport kesheniniń qurylysyn júrgizip jatyrmyz. Árıne, buǵan Taldyqorǵandaǵy sport keshenin kórgenimizdiń áseri bolǵany ras. Sondyqtan mundaı issaparlar óte qajet, bir-birimizden úırenetin tustarymyz az emes. Almaty oblysynan arnaıy kelgen áriptesterimizge alǵys bildiremiz», - dedi Shyǵys Qazaqstan oblysynyń ákimi Danıal Ahmetov eki jaqty memorandýmdarǵa qol qoıý rásiminde sóılegen sózinde.
О́z kezeginde Almaty oblysynyń ákimi Amandyq Batalov: «Alǵan áserimiz keremet. Kesheli-búgin kórgen dúnıelerimizdiń keıbirin ózimizdiń oblysqa engizsek degen oıymyz bar. Shyǵys Qazaqstan tek óndiristi óńir ǵana emes, munda áleýmettik sala nysandary kóp. Aýmaqtardy abattandyrý boıynsha kóptegen jumys atqarylyp jatqanyn kórdik. Ásirese sol jaǵalaýdaǵy etno saıabaqqa tánti boldym. Mundaı saıabaq tek shetelde ǵana bar shyǵar. Sizderdiki odan asyp túspese kem emes», - dedi.
Sonymen qatar Almaty oblysynyń ákimi Shyǵystyń dárigerlerdi shet elde oqytý tájirıbesin de úlgi retinde alýǵa bolatynyn atap ótti.
Azamat QASYM,
«Egemen Qazaqstan»
