-Biz qonaq úılerimen EKSPO-nyń ótýi barysynda qyzmet baǵalaryn kótermeý týraly memorandýmǵa qol qoıdyq. Negizgi otelder jelisine qatysty, ıaǵnı brendtik, álemdik ataýy: 4 nemese 5 juldyzdy qonaq úıler. Ol jerlerde baǵa sharyqtaǵan. Al, astanalyq qonaq úıler baǵalaryn turaqty ustaýda, - dedi «Astana Konvensh Bıýro» JShS dırektorynyń orynbasary Asqar Adambekov.
Ol otelder jelisi – turý nysany retinde baǵany retteý saıasatyna baǵynbaıtynyn aıtady. О́ıtkeni olardyń árqaısysynda óz baǵa saıasaty bar, sony ustanady.
-Ondaı jerlerde otelderdi basqarý baǵdarlamasy bar. Adam sany kóbeıgen saıyn baǵasy da qymbattaı beredi. Eger adam sany az bolsa, bólme baǵasy da tómen bolady. Olardyń qunynyń qoıylýyna osy otelderdiń ortalyq keńselerinde júrgiziletin saraptamalyq zertteýleri áser etedi. Sodan keıin baryp qana naryqqa saı tarıfi bekitiledi, - dedi «Astana Konvensh Bıýro» dırektorynyń orynbasary.
Adambekovtiń aıtýynsha, EKSPO qarsańynda otelder jelisi óz qyzmetteri úshin baǵasyn 20% qymbattatqan. Al, elorda qonaq úıleriniń baǵasy esh ózgerissiz qalady.
-Biz kúndelikti baǵany baqylap otyramyz. Jelilik otelderde baǵa 20 paıyzǵa ósti. Qazaqstandyq qonaq úıler bir qalypty ustaýda. Olar otelderdi basqarý baǵdarlamalaryn qoldanbaıdy. Kóbi bekitilgen tarıf boıynsha jumys isteıdi, - deıdi A.Adambekov.
Buǵan deıin Astana ákimdiginiń medıa ortalyǵy mamandandyrylǵan halyqaralyq EKSPO kórmesi qarsańynda Astanada qosymsha 11 qonaq úı ashylatyny týraly habarlaǵan bolatyn. Sonda barlyǵy 182 qonaq úı meımandardy qabyldaıdy. Qonaq úı qory 13 myń jatyn oryndy quraıdy.
EKSPO kezinde eń tıimdi, qaltany qaqpaıtyn turý oryndary – hostelder de jumys isteıdi. Búgingi tańda Astanada 45 hostel bar. Baǵasy nebári 5 myń teńgeden aspaıdy. Kórme kezinde hostelder 3 myń oryndy qamtamasyz etpek.
