Kapital.kz: Ulttyq bank azamattarǵa altyn quımalaryn sata bastady
Qazaqstan Respýblıkasynyń Ulttyq Banki «Halyqqa arnalǵan tazartylǵan altyn quımalardy satý men satyp alý» baǵdarlamasynyń iske qosylǵany týraly habarlaıdy.
Altyn quımalar ekinshi deńgeıdegi bankter arqyly satylatyn bolady. Altyn quımalardy ekinshi deńgeıdegi bankterdiń tutynýshyǵa kún saıyn tólem jasaý arqyly keri satyp alý múmkindigi olardyń ótimdiligin qamtamasyz etýdiń negizgi faktory bolady.
Baǵdarlamaǵa qatysatyn altyn quımalardy Qazaqstan teńge saraıy daıyndady jáne 10, 20, 50 jáne 100 gramm bolyp tórt túrde usynyldy. Máselen, 10 gramdyq quımalar kúreń qyzyl, 20 gramdyq – jasyl, 50 gramdyq – kógildir tústi arnaıy oraýmen jáne 100 gramdyq quımalar – altyn tústes oraýmen usynyldy.
Árbir quıma qorǵanysh elementterimen (quımalardyń tegis beti, mıkromátin jáne bederli qyr) jáne quımalardy mehanıkalyq búlinýden qorǵaıtyn jáne oraýdyń ashylǵan-ashylmaǵanyn ońaı tekserýge múmkindik beretin arnaıy oraýmen shyǵarylady.
Qorǵanysh oraý da quımanyń sapa sertıfıkaty bolyp tabylady. Sondyqtan, quımany uqyptaý saqtaý jáne oraýyn ashpaý usynylady.
LS: Qazaqstan altyn qory kólemi boıynsha álemdegi eń baı 15 eldiń qataryna kirmek
Qazaqstan Respýblıkasy Ulttyq banki altyn qoryn kóbeıtip jatyr. Bul týraly bas bankır Danııar Aqyshev málimdedi.
Onyń aıtýynsha, bas bank eldiń ishki naryǵynan altyn satyp alýdy jalǵastyra beredi. Bul turǵyda óndirýshiler úshin de osy tıimdi bolyp tur.
“Biz eldiń ishki naryǵynan affınajdy altyn satyp alýdy kúsheıte túsemiz. Osy oraıda, altyn shyǵarýshylardyń da josparlary úlken ekenin bilemin”, – dedi Aqyshev.
Qazirgi tańda, Aqyshevtiń málimetinshe, eldiń altyn qorynyń kólemi 260 tonnaǵa jetedi.
«Aldaǵy 10 jylda biz álem boıynsha altyn rezervi eń kóp 15 eldiń qataryna kiremiz» dedi Aqyshev.
Aıta keteıik, qazirgi tańda Qazaqstan altyn qory boıynsha álemde 21-shi orynda.
Naryk.kz: Qazaqstanda nesıe men depozıttiń paıyzdyq mólsherlemesi tómendeıdi
Qazaqstannyń qarjygerler qaýymdastyǵynyń málimetinshe, Qazaqstan Respýblıkasy Ulttyq bankiniń aldaǵy 5 shildedegi otyrysynda bazalyq mólsherlemeni azaıtý týraly sheshim qabyldanýy yqtımal.
Eger osyndaı sheshim qabyldanatyn bolsa, eldegi bank sektorynyń paıyzdyq mólsherlemeleri tómendeıdi. Bul nesıege de, depozıtke de qatysty, dep habarlaıdy qaýymdastyqtyqtyń resmı saıty.
Aıtpaqshy, taıaýda qaýymdastyqtyń jarııalaǵan nesıe jáne depozıt naryǵy týraly sholýda ekinshi deńgeıli bankter qazirdiń ózinde depozıtterdiń paıyzdyq mólsherlemesin tómendetý týraly sheshim qabyldap qoıǵany aıtylady.
Máselen, Forte bank depozıtiniń paıyzdyq mólsherlemesi teńgemen 13%-dan 11,5%-ǵa, dollarmen 1,5%-dan 1%-ǵa, al eýromen 0,25%-dan 0,1%-ǵa azaıtqan.
Alfa bank bolsa, depozıttiń mólsherin teńgemen 11%-dan 10,5%-ǵa, al VTB 9%-dan 8%-ǵa azaıtqan.
О́z kezeginde Eýrazııalyq bank kerisinshe, depozıttiń paıyzdyq mólsherlemesin teńgemen 12%-dan 13,1%-ǵa arttyrǵan.
Abctv.kz: Qazaqstan kishigirim munaı-ken oryndaryndaǵy óndiristi azaıtady
Qazaqstan Teńiz, Qarashyǵanaq jáne Qashaǵan ken oryndaryndaǵy munaı óndirisine basymdyq berýdi josparlap otyr.
Qazaqstandaǵy orta jáne shaǵyn munaı ken oryndaryndaǵy óndiris kólemi 2020 jylǵa deıin 33,2 mln tonnaǵa azaıady. Qazir bul kórsetkish 36 mln tonnany qurap otyr. Muny QR Energetıka mınıstri Qanat Bozymbaev málimdedi.
Mınıstrliginiń málimetinshe, aldaǵy ýaqytta barlaý men óndirýge bólinetin qarjy kólemi ulǵaıady. Bul óz kezeginde úsh jaqtan paıdaly: munaı óndirisi artady, jańadan 20 myń jumys orny ashylady jáne jobanyń jalpy qunynyń 32%-na teń keletin ınvestısııa tartylady.
2016 jyly ashylǵan Qashaǵan ken orny eki aıdyń ishinde óndiris qýatyn 1 mln tonnaǵa jetkizse, bıyl taǵy 5 mln tonna munaı men 3,1 tekshe metr gaz óndirmek. 2016 jyly ken ornyndaǵy óndiris kólemi josparly 75,5 mln tonnadan 78 mln tonnaǵa ulǵaıtylsa, 2017 jyly bul kórsetkish 81 mln tonnaǵa jetkizilmek.
«Sońǵy úsh jyldaǵy munaı qorynyń ósimi 196 mln tonna dep kórsetilgenimen qaıta esepteý kezinde 126 mln tonna boldy. Al barlaý qorytyndysy tek 70 mln tonna ekenin kórsetti. Jer qoınaýyn paıdalaný salasyndaǵy geologııalyq barlaýdy jetildirý úshin energetıka mınıstrligi «Jer qoınaýyn paıdalaný týraly» jáne «Salyq týraly» kodekske ózgeris engizdi. Bul ózgerister qyrkúıekte Parlamenttiń qaraýyna usynylady», – dedi mınıstr.
Vlast.kz: Ábý Dabı Plazanyń qashan ashylatyny belgili boldy
Ábý Dabı Plaza kópfýnksıonaldy keshen kelesi jyly tolyǵymen paıdalanýǵa beriledi, dep málimdedi jýrnalısterge ınvestısııalar jáne damý mınıstri Jeńis Qasymbek.
«Tórt ǵımarattyń úsheýi bıyl paıdalanýǵa beriledi. Eń bıigi kelesi jyly aıaqtalady» dedi Qasymbek.
Onyń aıtýynsha, ǵımarat bastapqyda josparlaǵandaǵydaı salynbaq.
«Ǵımarattyń bıiktigi sol bastapqy josparlaǵandaı bolady» dedi mınıstr.
