Foto: ashyq derekkóz
Onyń qarsylasy – ýltraońshyl Chega partııasynyń kóshbasshysy Andre Ventýra 33,2% daýys alyp, jeńilgenin moıyndady. Ventýra Segýrýdy jeńisimen quttyqtaǵanymen, aldaǵy ýaqytta eldegi bılik óz partııasyna ótetinine senimdi ekenin málimdedi.
Antonıý Joze Segýrý sońǵy 20 jylda Portýgalııada saılanǵan alǵashqy sosıalıst prezıdent atandy. Jeńisten keıin sóılegen sózinde ol úkimetpen teketireske barmaı, kerisinshe, yntymaqtastyqta jumys isteýge nıetti ekenin aıtty.
«Men bılikpen birlese jumys isteımin jáne bul ýádemde turamyn. Úkimetke qarsy shyqpaımyn, alaıda qabyldanatyn sheshimder men olardyń nátıjesine qatysty talap qoıa biletin prezıdent bolamyn», dedi Segýrý.
Prezıdenttik saılaýdyń birinshi kezeńi 18 qańtarda ótken. Onda kandıdattardyń eshqaısysy 50%-dan joǵary daýys jınaı almaǵan. Bul Portýgalııada 1986 jyldan beri alǵash ret tirkelgen jaǵdaı. Birinshi týrda Segýrý 31,1%, al Ventýra 23,5% daýys jınaǵan.
Andre Ventýrany 1,5 mıllıonnan astam saılaýshy qoldaǵan. Bul – 2019 jyly qurylǵan Chega partııasy úshin eń joǵary nátıje. Qazirgi tańda partııa parlamenttegi eń iri oppozısııalyq kúsh bolyp otyr.
Aıta keteıik, Portýgalııa prezıdenti negizinen ókildik fýnksııalardy atqarady. Degenmen ol parlament qabyldaǵan zańdarǵa veto qoıýǵa, al erekshe jaǵdaılarda parlamentti taratyp, merziminen buryn saılaý taǵaıyndaýǵa quqyly.
Antonıý Joze Segýrýdyń ınaýgýrasııasy 9 naýryzǵa josparlanǵan.
