Foto: ashyq derekkóz
2025 jyldyń mamyrynan bastap Otbasy bank turǵyn úıge muqtaj adamdardyń kezegin ortalyqtandyrylǵan formatta júrgizip, jalǵa jáne kredıttik turǵyn úıdi bólýdi qolǵa aldy. Tamyz aıynda ákimdikter bankke 642 myńnan astam kezekte turǵan azamattyń derekterin joldaǵan. Qazannan bastap osy baza kezeń-kezeńimen tekserile bastady. Maqsat – derekterdi jańartý jáne memlekettik qoldaýdy ádil bólý.
«Otbasy bank» ýnıversıtet oqytýshylaryn baspanamen qamtýǵa kómektesedi
Taldaý barysynda buryn tolyq rettelmegen júıelik olqylyqtar men azamattardyń jeke jaǵdaılaryna qatysty máseleler anyqtaldy. Olardyń qatarynda qaǵaz esepten elektrondyq formatqa kóshý kezinde derekterdiń joǵalýy, mekenjaıdyń ózgerýi, múliktegi mardymsyz úles, otbasy quramyn tirkeýdegi qatelikter, sondaı-aq jetim balalar men múgedektigi bar adamdardyń quqyqtaryna qatysty túıtkilder bar.
Osyǵan baılanysty bank azamattardyń quqyǵyn qorǵaý úshin birqatar sheshim qabyldady. Atap aıtqanda, jetim balalardyń oqý nemese jumys úshin basqa qalaǵa kóshýine baılanysty tirkeýi ózgerse de, olar kezekke turǵan aımaq boıynsha memlekettik qoldaýdy ala beredi. Páterdegi óte az úlestiń bolýy endi kedergi emes. 2026 jyldyń aqpanynan bastap mundaı azamattar jalǵa beriletin turǵyn úı men jeńildetilgen ıpotekaǵa úmitker bola alady.
Sondaı-aq kredıttik nemese jalǵa beriletin turǵyn úıden bas tartqanymen, ol úıde naqty turmaǵanyn rastaıtyn qujaty bar adamdar qaıtadan kezekke tura alady. Jetim balalar men múgedektigi bar adamdarǵa tabyssyz da talapty oryndaýǵa, qosalqy qaryz alýshylar retinde eki adamǵa deıin tartýǵa ruqsat etildi. Baqsha sharýashylyǵy ýchaskesindegi úıi bar azamattar da kezekke turý jáne memlekettik qoldaý alý quqyǵyn saqtaıdy.
Derekterdi qolmen engizý kezinde ketken qatelikter aryz, ákimdik haty nemese sot sheshimi negizinde túzetiledi. Otbasy quramynda bóten adamdar kórsetilgen jaǵdaıda da rastaıtyn qujattar arqyly túzetý múmkindigi bar. Ákimshilik reformadan keıin óńirlik shekaralar ózgerýine baılanysty eskirgen málimetter aryz arqyly jańartylady. Shetel azamattarymen nekede turǵan jaǵdaıda jubaılar ınventarızasııa kezinde otbasy quramynan shyǵarylýy múmkin.
Eń mańyzdy jańalyqtardyń biri turǵyn úıdi tek derekteri jańartylǵan, túgendeýden ótken azamattarǵa bólý qaǵıdatynyń engizilýi. Bul kezekte.kz júıesindegi eski málimetterge súıenip ketken qatelikterdiń aldyn alýǵa tıis.
Zeınetaqy jınaǵyn turǵyn úı satyp alýǵa paıdalaný tártibi ózgertildi
Otbasy bank qabyldanǵan barlyq sheshimder zańnama aıasynda iske asatynyn atap ótti. Bank basqarma tóraǵasy Lázzat Ibragımova:
«Kezektegi ár jazbanyń artynda otbasynyń ómiri, úmiti baryn túsinemiz. Bizdiń mindet ár jaǵdaıdy ádil qarastyrý. Buryn júıede qatelik bolsa, ony búgin túzetýimiz kerek. Otbasy bank halyqtyń muń-muqtajyn estip otyr jáne el turǵyndarynyń ómirin naqty jaqsartatyn sheshimder qabyldaýdy jalǵastyrady», dedi.
Bank aldaǵy ýaqytta derekterdi jańartý jumystaryn jalǵastyryp, kúrdeli jaǵdaılardy jedel ári keshendi qarastyrý úshin arnaıy turǵyn úı komıssııasyn qurý múmkindigin de joqqa shyǵarmaıdy.
