«Memleket basshysy men Úkimet qoldaýynyń arqasynda ishki ister organdarynyń materıaldyq-tehnıkalyq jaǵdaıy jyldan jylǵa jaqsaryp keledi. Búgin kólik polısııasy Astana áýejaıynda Jelilik ishki ister bóliminiń (JIIB) barlyq qajettilikterine jaýap beretin jańa qyzmettik baspanasyna qol jetkizip otyr», dedi saltanatty sharada Ishki ister mınıstri.
Q.Qasymov óz sózinde «EKSPO-2017» halyqaralyq kórmesin ótkizý qarsańynda elordanyń áýejaıy men vokzaldaryna sheteldik qonaqtar men elimizdiń turǵyndary kóptep aǵylatynyn atap ótti.
«Sondyqtan Astanaǵa keletin qonaqtar ózderin jaıly ári qaýipsiz sezinýi úshin bar kúshterin salatyn kólik polısııasyna júkteler jaýapkershilik júgi aýyr», dedi mınıstr.
Mınıstr jańa ǵımaratty aralap, ishki jabdyqtarymen, sondaı-aq kólik polısııasynyń qyzmet atqaratyn oryndarymen tanysyp shyqty.
Jelilik ishki ister bóliminiń jańa ǵımaraty «EKSPO-2017» kórmesine daıyndyq jáne ony ótkizý kezindegi qaýipsizdik pen quqyqtyq tártipti qamtamasyz etý is-sharalary jospary aıasynda salyndy.
Atap ótsek, Astana qalasynyń áýejaıy táýligine 10 myńnan astam jolaýshy qabyldaıdy, al merekelik kúnderi bul kórsetkish eki esege kóbeıedi. Áýejaıǵa kúnine 160 jolaýshy ushaǵy ushyp-qonady. Soǵan baılanysty elimizdiń kólik polısııasy quqyq buzýshylyqtyń aldyn alýǵa jáne azamattardyń qaýipsizdigin qamtamasyz etýge aıyryqsha kóńil bóledi.
Esterińizge sala keteıik, 31 mamyr kúni Memleket basshysy Nursultan Nazarbaev Astana áýejaıynyń jańa termınalyn ashqan bolatyn.
