Jalpy, Qazaqstannyń BUU Qaýipsizdik Keńesiniń turaqty emes múshesi bolyp saılanýyna Elbasy N.Á.Nazarbaevtyń belsendi halyqaralyq, reformatorlyq jáne bitimgerlik qyzmeti arqyly jınaqtaǵan bedeli men oǵan degen halyqaralyq qoǵamdastyqtyń úlken senimniń oń áser etkeni belgili.
Qazaqstannyń BUU Qaýipsizdik Keńesindegi músheligi, mańyzdy strategııalyq joba retinde tek bizdiń elimizge ǵana emes, sonymen qatar, uıymnyń ózi úshin de biregeı oqıǵa bolyp tabylady. Osylaısha, Qazaqstan sekildi shırek ǵasyrlyq qana táýelsiz tarıhy bar elge álemdegi qaýipsizdik baǵytyndaǵy kúrmeýi qıyn kúrdeli máselelerdi sheshý úshin aralasýǵa múmkindik berilip otyr.
Biz úshin bul mıssııa – tek qurmetti mindetkerlik qana emes, sonymen qatar, álemdegi oryn alǵan teketiresterdi sheshýge, bitimgerlik baǵytynda jınaqtalǵan óz tájirıbemizden naqty usynystar men áreketter jasap, BUU-nyń bedelin nyǵaıtýǵa, onyń álem elderi arasyndaǵy abyroıyn arttyrýǵa atsalysý, Uıymnyń nazaryn aımaq máselelerine burý. Sondyqtan, biz bul jaýapty mıssııaǵa úlken daıyndyqpen, aýqymdy josparlarmen, olardy júzege asyramyz degen zor úmitpen keldik.
Qazaqstan BUU Qaýipsizdik Keńesiniń múshesi bolyp qabyldanǵan kúnnen bastap-aq óziniń bar nazaryn transulttyq qaýipsizdik máselelerine, sonyń ishinde halyqaralyq qatynastyń tórt basymdy salasy – azyq-túlik, sý, energetıka jáne ıadrolyq qaýipsizdik salalaryna aýdardy.
Bizdiń osy aralyqtaǵy basty maqsattarymyz − oryn alǵan qarama-qaıshylyqtardy barynsha dıplomatııalyq jolmen sheshýge naqty áreketter jasaý, halyqaralyq qoǵamdastyqta bólinýdiń jańa syzyqtarynyń paıda bolýyna jol bermeý, teketires aımaqtarynda barlyq taraptar múddeleriniń saqtalýyna qajetti jaǵdaıdy jasaý jáne de BUU damýynyń negizgi baǵyttary boıynsha konsensýstyq alańdy qalyptastyrý.
Bizdiń BUU Qaýipsizdik Keńesine músheligimizdiń bastapqy kezeńinde-aq aýqymdy baǵdarlama jasalyp, ol birtindep júzege asyrylýda. BUU-nyń negizgi ólshemderi aıasyndaǵy alǵa qoıylǵan maqsattar boıynsha jáne basqa da ólshemaralyq máselelerge qatysty kúndelikti júıeli jumystar atqarylyp, olar óz kezeginde aıtarlyqtaı nátıjeler alyp kelýde.
Qazaqstan kóptegen máselelerge qatysty pikirtalastyq bastama kóterý arqyly Keńesti «shıratyp» alýǵa qol jetkizdi. Qaýipsizdik Keńesiniń osy jyldyń 10 qańtaryndaǵy otyrysynda Elbasy N.Á.Nazarbaevtyń múshe memleketterge arnalǵan baǵdarlamalyq Úndeýi aýqymdy jospardyń bastamasy ekenin tanytyp, BUU-nyń barynsha ózekti máselelerin kópjaqty talqylaýǵa ekpin berýmen qatar, Keńestiń belsendi múshesi retinde Astana maqsattarynyń salmaqtylyǵyn kórsetti.
Qazaqstan BUU-nyń ıadrolyq qaýipsizdik, sý, azyq-túlik jáne energetıkalyq ólshemderi arasyndaǵy tepe-teńdikti qamtamasyz etýge umtylys tanytý ústinde. Jalpy alǵanda, Qazaqstan BUU-nyń negizgi ólshemderi boıynsha kóptegen is-sharalardyń júzege asýyn qamtamasyz etýde. Munyń bir dáleli retinde Sırııa daǵdarysyna qatysty ústimizdegi jyly elordada birneshe dúrkin ótken «Astana prosesi» degen ataýǵa ıe bolǵan kelissózderdi aıtýǵa bolady. Máseleniń kúrdeliligine qaramastan, elimiz taraptardy bir ústel basyna jınap, kún tártibindegi árbir máseleni jan-jaqty talqylap, ortaq beıbit sheshim qabyldaýǵa barynsha yqpal etýde.
Qazaqstan qaı kezde bolsa da, Aýǵanstan máselesin de kún tártibinen túsirgen emes. Elimiz jahandyq jáne aımaqtyq qaýipsizdik turǵysynan qarastyrylatyn aýǵan isine qatysty halyqaralyq koalısııanyń oń talpynystaryna udaıy qoldaý kórsetip keledi.
Qazaqstan BUU Qaýipsizdik Keńesiniń turaqty emes múshesi retinde álemdik qaýipsizdikti qamtamasyz etý maqsatynda aımaqtyq jáne halyqaralyq uıymdardyń ózara yqpaldastyǵyn nyǵaıtýdy usynady. Naqtylaı aıtqanda, Qazaqstan aımaqtyq jáne halyqaralyq uıymdardyń ózara yntymaqtastyǵyn qamtıtyn tıimdi halyqaralyq qaýipsizdik júıesin qalyptastyrýdy qoldaıdy.
Nurlan Seıdin,
saıasattanýshy
