Qysqy Olımpıada demekshi, osydan tórt jyl buryn Sochıde ótken oıyndarda bizdiń el Denıs Tenniń jalǵyz ǵana qola júldesimen kóńil jubatqan. Atalǵan dodany kózben kórgen myna biz sporttyq delegasııamyzdy basqarǵan azamattardyń sol kezde qatty sasqanyna kýá bolǵan edik. Tenniń «qolasy» bolmasa, abyroıdan jurdaı bolady ekenbiz-aý dep biz de demimizdi ishke alǵanbyz. Nesin aıtasyz, sol Sochı bizdegi qysqy sporttyń kenjelep qalǵanyn, qysylǵanda qaırat qylar ul-qyzdarymyzdyń joqqa tán ekendigin kózge shuqyp kórsetken edi-aý...
Joǵarydaǵy áńgimemizge oralaıyq. «Týǵan aı týraǵan etpen teń» degen qazaq. Áne-mine degenshe toǵyz aıdyń qalaı óte shyqqanyn bilmeı de qalamyz. Sol sebepti, osy bastan qamdanbasaq bolmaıdy. Qazaq eliniń qysqy sportta talasy bar órenderine tastúıin daıyndyq kerek. Endigi másele mynada: biz Sochı-2014 Olımpıadasynan sabaq ala bildik pe?
Taıaýda Sport jáne dene shynyqtyrý isteri komıtetiniń tóraǵasy Elsııar Qanaǵatovpen kezdeskenimizde, aradaǵy áńgimemiz qyr astyndaǵy qysqy Olımpıadaǵa degen daıarlyq barysy arqaý boldy. Tóraǵanyń aıtýynsha, búgingi kúnniń ózinde 62 sportshymyz joldamadan úmitker eken. Al muzda mánerlep syrǵanaýshy sheberlerimizdiń lısenzııasy resmı túrde rastalǵan. Joldamanyń basym bóligin aldymyzdaǵy 2017-2018 jylǵy maýsymda ótetin halyqaralyq týrnırlerde alý josparlanypty.
Budan bólek, el quramasynyń qysqy Olımpıadaǵa degen daıarlyǵyn talqylaǵan jıynda Ulttyq Olımpıada komıtetiniń prezıdenti Tımýr Qulybaev qalyń uıqy qushaǵynda júrgen federasııalardy oıatý kerek dedi. «Ulttyq qurama komandalardyń daıarlyq barysyna Ulttyq Olımpıada komıteti jetekshilik etetin bolady. Bizde «uıqydaǵy» federasııalar bar, olarǵa qozǵaý salatyn ýaqyt jetti. Bul sharýadan mán shyqpasa, onda olardy aýystyramyz. Bizge sporttyń jiligin shaǵyp, maıyn ishkender ǵana emes, sonymen qatar, osy salanyń damýyna ınvestısııa quıýǵa daıyn adamdar kerek», – dep atap aıtty Qulybaev myrza.
«Úsh kúndigin oılamaǵan áıelden bez, úsh jyldyǵyn oılamaǵan erkekten bez» deıdi halyq danalyǵy. Munyń bári durys, árıne. Erte bastan qamdanǵan – kúni erteń qapy qalmaıdy. Biraq, osy jolǵy dodada Denıs Tennen basqa úmit artatyn kimimiz bar, ózi? Keshegi ótken XXVIII Búkilálemdik qysqy Ýnıversıada jarysynda 11 altyn, 8 kúmis jáne 17 qola medalmen jalpy esepte tek qana Reseıdi alǵa jiberip, máreni ekinshi bolyp qıdyq dep maqtanǵanda aldymen máselege tereńirek úńilip alýymyz kerek shyǵar. Birinshiden, Olımpıada men Ýnıversıadanyń arasy jer men kókteı. Ekinshiden, stýdentterdiń sol saıysyna qysqy sporttaǵy sańlaqtarymyzdyń bárin qostyq. Sonyń ózinde kórshimizdiń shańyna ilese almadyq. Maqtaýly Denıs Tenniń deńgeıi tómen boldy, jarylqaıdy dep júrgen jelaıaq qyzymyz Ekaterına Aıdova aıdalada qaldy, Roman Krechke de rıza bolmadyq, short-trekshilerimiz ol – shań jutyp qaldy. Bulardy alabóten atap otyrǵanymyzda sebep bar: atalǵan sportshylar – Olımpıadada júlde alady dep úmit artqan aınalaıyndarymyz. Osynyń bárine qarap otyryp, «Áı, osy biz Sochıden sabaq ala aldyq pa?», degen oıǵa qalasyń...
Iá, búgingi kúnde Qazaq sportynda qabyrǵaly ózgerister bolyp jatyr. Eski júıeniń ornyna álemdegi ozyq tájirıbelerge súıengen esti júıe keldi. Munda sporttyq federasııalarǵa mol múmkindikter men basymdyqtar berilgen. Jalpaq tilmen aıtqanda, olardyń qaǵanaǵy qarq, saǵanaǵy sarq bolady. Biraq, senim júgi artyp, jaýapkershilik te kúsheıgen. Estýimizshe, sporttyń birneshe túrinen sheteldik mamandar sportshylarymyzdy jattyqtyryp júr eken.
Ulttyq Olımpıada komıtetiniń basshysy el qurama komandalaryn tórtjyldyqtyń basty dodasyna daıyndaǵanda keshendi-ǵylymı toptardyń (KǴT) mańyzdy ról atqaratynyna erekshe mán berip otyr. Degenmen, óńirlerde qysqy sportty damytpaı, ınfraqurylymǵa ınvestısııa quımaı, shańǵy men konkıdi túsinde kóretin balalar men jasóspirimderge jaǵdaı jasamaıynsha, kósegemiz kógermeıdi. Mine, birinshi kezekte osyǵan mán berý kerek. Artynan qaýlap ósken óńkeı talant tirep turmasa, at tóbelindeı az ǵana toppen alysqa barmasymyz anyq.
Qaırat ÁBILDINOV,
