Komandalyq sport túrleriniń qıyndyǵy kóp. Boksshy nemese balýan sekildi jalǵyz óziń daıyndalyp, qarsylastyń bárin «qırata» salmaısyń. 11 oıynshynyń bireýi álsizdik tanytsa boldy, sonyń ózi jalpy nátıjege áser etedi. Al bizdiń quramadaǵy jaǵdaı tipten qıyn. Komandany alǵa jeteleıtin eń bolmasa bir fýtbolshy joq. Senim artqan kapıtan Baýyrjan Islamhannyń ózi komandasyn qıyn jaǵdaıǵa qaldyryp ketti. Osydan keıin ne aıtýǵa bolady?
– Quralbek Dosjanuly, Almatyda Danııa quramasymen kezdesken Qazaqstan quramasynyń ónerine qandaı baǵa beresiz?
– Qazaqstan men Danııa kezdesýin tamashaladym. Men bul oıynǵa «3» degen baǵa qoıdym. Danııa quramasynyń fýtbolshylary óte jas, ári daryndy. Bolashaqtarynan úlken úmit kúttiretin oıynshylar. Soǵan qaramastan, bizdiń qurama óz múmkindikterinen tómen oınady. Bas bapker Aleksandr Borodıýk keıbir fýtbolshylarǵa durys baǵyt bermegen sekildi. Quramany tańdaýda qatelikter jibergen. Ǵafýrjan Súıimbaev «Qaıratta» sol qaptalda oınasa, keshegi oıynda qorǵanysta, oń qanatynda óner kórsetti. Ekinshi taımda Shomkony aýystyryp alańǵa shyqqan Iаn Vorogovskıı negizi jartylaı qorǵaýshy. Sondaı-aq, jalpy qorǵanysta alty fýtbolshy júrdi de, shabýylǵa tek Nóserbaevty shyǵardy. Oıyn taktıkasy ortasha boldy. Sebebi, fýtbolda sheberlik basym ról oınaıdy.
Danııa fýtbolshylary bizdi mensinbeı shyqqan sekildi kórindi. Matchtyń alǵashqy 15-mınýtynda basymdyqty Qazaqstanǵa berip qoıdy. Alaıda, bizdiń fýtbolshylar dopqa kóbirek baqylaý jasasa da óz múmkindikterin tıimdi paıdalana almady. Ári-beri júgirip, bosqa sharshap qalǵan sııaqty. Al qonaqtar birinshi taımda eki shabýyl uıymdastyrdy. Onyń bireýi golmen aıaqtaldy. Fýtbolda bosqa kóp júgire berýdiń qajeti joq.
– Ǵafýrjan Súıimbaevtyń óz pozısııasynda oınamaǵanyn aıttyńyz. Bapker mundaı qadamǵa nelikten bardy dep oılaısyz?
– Bas bapkerdiń óziniń taktıkasy bolǵan shyǵar. Biraq, qandaı taktıka bolsyn ár oıynshynyń fýtbolda orny bolady. Ǵafýrjan negizi solaqaı. Ekinshi taımda Beısebekovti shyǵardy. Ony negizi matchtyń basynan oınatý kerek edi. Sonda durys bolar ma edi dep oılaımyn.
– Kapıtan Baýyrjan Islamhan quramany birinshi taımda-aq qıyn jaǵdaıǵa qaldyryp ketti. Baýyrjannyń bul birinshi áreketi emes. Nelikten asa mańyzdy oıyndarda kapıtannyń júıkesi jıi syr beredi?
– Islamhannyń istegeni durys emes. Qarsylasyń qanshalyqty teýip toqtatyp jatsa da, ashýǵa boı aldyrmaǵan jón. Fýtbolshy degen salqynqandy bolýy kerek. Bul jerde Baýyrjan ortalyq alańda, eshqandaı qaýipti shabýyl bolmasa da, osyndaı tártipsizdik jasap otyr. Munyń bári Qazaqstanda chempıonatyndaǵy keıbir tóreshilerdiń mundaı áreketterge kóz juma qaraýynan. Ishki chempıonatta ábden erkinsip úırenip qalǵandyqtan mundaı ospadar qylyqtar halyqaralyq arena da qaıtalanyp jatady.
– Aldaǵy taǵy birneshe match bar. Sol kezdesýlerde mynandaı oıynmen upaı jınaı alamyz ba?
– Endi bapkerler shtaby qaı jerde qatelik ketkenin taldaý jasap, qorytyndy shyǵarýy qajet. Sol qatelikterdi kelesi joly jibermeýdi oılastyrýy tıis. Árdaıym utýǵa múmkindik bolady. 1 qyrkúıekte Astanada Chernogorııany qabyldaımyz. Sol kezde qalaı bolǵanda jeńilmeýdiń jaǵdaıyn jasaýy tıis. Men árdaıym quramadan úlken úmit kútemin. Munyń barlyǵy chempıonatqa baılanysty. Chempıonat joǵary deńgeıli bolsa, fýtbolshylardyń sheberligi ósedi, shyńdalady.
– Sońǵy oıynǵa bas bapker shabýylshy Sergeı Hıjnıchenkony shaqyrmady. Borodıýk munyń sebebin Sergeıdiń Belarýs chempıonatyndaǵy oıyn praktıkasynyń azdyǵymen baılanystyrdy.
– Kimdi shaqyrý, kimdi shaqyrmaıtynyn bapker ózi biledi ǵoı. Degenmen, Borodıýktiń stadıon jaǵalap oıyn kórmeıtini tańqaldyrady. Jaqynda Almatyda «Qaırat» pen «Astana» kezdesti. Chempıonattyń ortalyq oıyny. Borodıýkti stadıonnan kórmedim. Bas bapker stadıonǵa baryp oıyn kórmese, fýtbolshylardy qalaı tańdaıdy? Belarýs memleketi de jaqyn ornalasqan. Nege kómekshileriniń birin jibermeıdi. Sol kezde Sergeı Hıjnıchenkonyń qandaı formada júrgenin kóretin edi ǵoı. Jattyqtyrýshy óz jumysyna salǵyrt qarasa, nátıje qaıdan bolsyn?
Áńgimelesken
Bek TО́LEÝOV,
jýrnalıst
ASTANA
