Q. Toqaev áńgime barysynda balama energetıka salasyndaǵy jańa jobalar kórsetiletin jahandyq alańǵa aınalǵan «EKSPO-2017» halyqaralyq kórmesine EQYU-nyń belsendi qatysýyn rızashylyqpen atap ótti. «Ekonomıka-ekologııalyq ólshem turǵysyndaǵy EQYU-nyń aýqymdy tájirıbesin, bilimi men atqarǵan isterin eskere otyryp, Uıym álem qaýymdastyǵymen paıdaly aqparatpen bólisedi dep senemin», - dedi joǵarǵy Palatanyń basshysy.
Q. Toqaev EQYU-ǵa Aýstrııanyń tóraǵalyq etýine qoldaý bildire otyryp, EKSPO-nyń «Bolashaqtyń energııasy» taqyryby ekonomıka-ekologııalyq ólshem salasyndaǵy EQYU-nyń Vena jarııa etken basymdyqtarymen úılesetinin atap ótti. Tóraǵa Aýstrııa tóraǵalyq etken kezdegi EQYU-nyń Ekonomıka-ekologııa komıtetiniń basshylyǵyna Qazaqstandy taǵaıyndaý týraly sheshimin joǵary baǵalady. Osyǵan baılanysty «EKSPO-2017» aıasynda 15-16 maýsymda ótetin 25-shi Ekonomıka-ekologııa forýmyna ázirliktiń ekinshi kezdesýiniń mańyzdylyǵy atap ótildi.
Taraptar aımaqtyq qaýipsizdikti nyǵaıtý, terrorızm men ekstremızmge qarsy is-qımyl máseleleri boıynsha pikir almasty. EQYU-nyń qazirgi kún tártibi týraly aıta kelip, Q.Toqaev parlamenttik qoǵamdastyq tarapynyń dıplomatııalyq kúsh-jigeriniń mańyzdylyǵyna toqtaldy. «Parlamenttik dıplomatııa memleketaralyq qatynastarda tıimdi qural bolyp tabylady jáne ol EQYU aımaǵynda nyq senimdi qalpyna keltirýde tabystarǵa qol jetkizý úshin paıdalanýy tıis», - dedi Senat Tóraǵasy.
Júzdesýshiler Qazaqstan men Aýstrııanyń parlamentaralyq dıalogyn damytý máselelerine basa nazar aýdardy.
K. Mýttonen Aýstrııanyń EQYU-ǵa tóraǵalyq etýine qoldaý bildirgeni úshin, Uıym qyzmetiniń negizgi máseleleri boıynsha jáne Parlamenttik Assambleıadaǵy Qazaqstannyń belsendi qyzmetine oraı Q.Toqaevqa rızashylyǵyn aıtty.
