Nassım Taleb álemdik ekonomıkaǵa aıtarlyqtaı saldary tıetin boljaýǵa kelmeıtin oqıǵalarǵa negizdelgen «qara aqqýlar» (teorııa «chernyh lebedeı») teorııasynyń avtory. Bul teorııaǵa mysal retinde ınternettiń damýyn, Birinshi dúnıejúzilik soǵys, Keńes Odaǵynyń kúıreýi men 11 qyrkúıektegi shabýyldy ataýǵa bolady. Davosta ótken Búkilálemdik ekonomıkalyq forýmda, Boaosktaǵy Azııalyq forýmda jáne Peterbýrgtegi halyqaralyq ekonomıkalyq forýmda spıkerler óz baıandamalarynda bolashaqta oryn alatyn álemdegi ekonomıkalyq ahýal týraly aıtqanda atalmysh teorııaǵa jıi silteme jasap otyrǵan.
– Nassım Talebtiń kitaptary álemdik bestsellerge aınaldy. QR Tuńǵysh Prezıdenti – Elbasy Qorymen birge biz avtordyń «qara aqqýlar» teorııasy týraly kitabyn qazaq tiline aýdarýdy usynǵymyz keledi, – dedi óz sózinde ÁESI dırektory Erjan Saltybaev.
«Bul kitap álemniń 27 tiline aýdarylǵan, álem boıynsha 3 mıllıonnan astam danasy satylǵan. Aldaǵy jyldarda Qazaqstanda álemniń ár tilderinen 100 úzdik kitap qazaq tiline tárjimalanady – óskeleń urpaqtyń qoǵamdyq sanasyn jańǵyrtý degenimiz osy», dedi ÁESI dırektory.
Kezdesý sońynda ÁESI dırektory Erjan Saltybaev Nassım Talebti jalpy álem men Eýrazııa aımaqtary áser etetin jahandyq tendensııalar men olardy sheshý joldaryn qarastyrýǵa arnalǵan Astana klýbynyń kezekti otyrysyna qatysýǵa shaqyrdy.
Qazirgi tańda Nassım Nıkolas Taleb Nıý-Iork ýnıversıtetinde ınjınırıng syn-qaterleri professory. Tolyq emes aqparat negizinde sheshim qabyldaý prınsıpterin, sonymen birge, «qara aqqýlar» teorııasyna jatatyn saıası jáne ekonomıkalyq júıelerdi ázirleý boıynsha mamandandyrylǵan. Akademııalyq mansabyna deıin CreditSuisseFirstBoston, UBS, BNP-Paribas, Indosuez sekildi iri qarjy ortalyqtaryn laýazymdy qyzmetter atqardy.
ÁESI Qazaqstan Respýblıkasy Tuńǵysh Prezıdentiniń memlekettilikti qalyptastyrý men nyǵaıtý, halyqaralyq yntymaqtastyqty damytý men beıbitshilik pen turaqtylyqty qamtamasyz etýge qosqan úlesin zertteıdi. ÁESI pikirtalas alańy Ult Kóshbasshysynyń strategııalyq bastamalaryn jan-jaqty nasıhattaý aıasynda jáne olardy júzege asyrý joldaryn qalyptastyrý boıynsha jumys isteıdi.
