Memlekettik hatshy aldymen qazaq pen polıak ulttary arasyndaǵy dostyqtyń tamyry tereńde jatqanyn atap ótti.
Jalpy, polıaktardyń ultymyzǵa degen qurmeti men iltıpaty erekshe ekeni belgili. Eń alǵash eýropalyqtarǵa Uly Dalamyz týraly syr shertken Polsha monarhy Benedıkt bolsa, álem ádebıetinde qazaqtar jaıly tuńǵysh poema jazǵan da polıak perzenti, áıgili romantık aqyn Gýstav Zelınskıı bolatyn. Bertinde halqymyzdyń myń kúıin notaǵa túsirip, rýhanı qazynamyzǵa ólsheýsiz úles qosqan Aleksandr Zataevıch te polıak ekenin kóziqaraqty qaýym jaqsy biledi. Mine, eki el arasynda baıyrǵydan qalyptasqan dostyq ráýishtegi dástúr búginge deıin jalǵasyn taýyp otyr.
– Biz Polshany qarqyndy damyp kele jatqan memleket retinde jaqsy bilemiz. Elderińizde ekonomıka salasyna, sonyń ishinde orta jáne shaǵyn kásipkerlikti damytýǵa qolaıly jaǵdaı jasalǵanyn byltyrǵy saparymyzda anyq baıqadyq. О́tken jyly tamyz aıynda Qazaqstan Prezıdenti Nursultan Nazarbaev Polshaǵa resmı saparmen barǵany málim. Sapar barysynda ekijaqty baılanysty nyǵaıtatyn kóptegen, kelissózder júrgizilip kelisimder jasaldy. Al bıylǵy qyrkúıek aıynda Polsha Respýblıkasynyń Prezıdenti Andjeı Dýdanyń elimizge sapary kútilip otyr, – dedi Gúlshara Ábdiqalyqova.
Onyń aıtýynsha, búginde Qazaqstanda polıak etnosynyń 32 myńnan astam ókili turady. Ekijaqty qarym-qatynastyń aýqymy mádenıet pen gýmanıtarlyq salada da keńeıip keledi. Qazirgi tańda elimizdiń 700-den astam jasy Polshanyń ýnıversıtetteri men kolledjderinde bilim alyp jatyr. «Jaqynda Astana men Varshava arasyna ushatyn tikeleı reıs ashyldy. Ortalyq Azııa men Polshany biriktiretin reıstiń arqasynda eki eldiń baılanysy artyp, týrızm salasy damıtyny anyq», dedi Memlekettik hatshy.
Sonymen birge, ol Qazaqstan men Eýropalyq odaq arasyndaǵy seriktestik pen yntymaqtastyqty keńeıtý týraly kelisimge Polsha Parlamenti alǵashqylardyń biri bolyp ún qosyp, kelisimdi ratıfıkasııalaǵanyna alǵys bildirdi.
О́z kezeginde sóz alǵan Polsha Parlamenti Senaty Tóraǵasynyń orynbasary Marııa Kos jyly qabyldaýǵa rızashylyǵyn bildirdi. Onyń aıtýynsha, taǵdyr talaıymen Qazaqstanǵa kóship kelgen talaı etnos ókili osynda beıbit jaǵdaıda ómir súrip jatyr. Sonyń ishinde polıaktarǵa da salt-dástúrin saqtap, tarıhy men mádenıetin damytýǵa múmkindik berilgen. Bul Qazaqstannyń beıbitshilik pen turaqtylyqty saqtaı otyryp órkendep kele jatqan el ekenin kórsetedi.
Sondaı-aq, ol qazaq-polıak qarym-qatynastarynyń qazirgi ahýaly men saıası-ekonomıkalyq yntymaqtastyqty nyǵaıtý máselesin qozǵady.
Kezdesý sońynda Memlekettik hatshy Gúlshara Ábdiqalyqova Polshany 2018-2019 jyldary BUU Qaýipsizdik Keńesiniń turaqty emes músheligine saılanýymen quttyqtady.
Qymbat TOQTAMURAT,
«Egemen Qazaqstan»
