Ashat RAIQUL,
«Egemen Qazaqstan»
«Monýment tolyq kúrdeli jóndeýden ótti. Árlep, bezendirý jumystaryna qazaqstandyq jas dızaınerlerdi tarttyq. Kópshiliktiń kúsh salýynyń arqasynda búgingi jetistikke jetip otyrmyz. Astana qalasy ákiminiń qatysýymen birneshe ret keńes jıyndar ótti. Barlyq máselelerge jiti qaraýǵa tyrystyq», deıdi «Astana-Báıterek» JShS dırektory Murat Saparǵalıev.
Jóndeý jumystary barysynda mármár plıtkalar men satylar aýystyrylǵan, nysannyń metall qurylǵylary korrozııaǵa qarsy jabynmen óńdelip, boıalǵan. Sanıtarlyq toraptardyń jabdyqtary men vıtrajdar jańasyna aýystyrylypty. Jańartylǵan dızaın boıynsha munaranyń ishki jaǵyn árleý jumystary kópqyrly stılde júrgizildi. Taǵy bir jańalyq – bólek LED-ekrany bar zamanaýı óner galereıasy ashylǵan. Sonymen qatar, monýmenttiń foıesine gabarıtti ıilgish LED-ekran qoıylypty. «Báıterektiń» tóbesindegi kókte samǵap júrgen Samuryq qus túrindegi jańa aspaly sham da kelýshilerdi beıjaı qaldyrmasy anyq.
M.Saparǵalıevtiń aıtýynsha, negizgi sharýa Astana qalasy ákimdigi tartqan demeýshilerdiń kómegimen bitken. Qazirgi tańda munda elýge jýyq qyzmetker jumys isteıdi. «Báıterekti» ótken jyly 500 myńnan astam adam tamashalaǵan eken.
Astana ákimdigi EKSPO-2017 kórmesi kezinde kelýshilermen jumys jasaý úshin eriktilerdi tartpaq. Kelýshilerge qolaıly jaǵdaı jasaý maqsatynda bılet satylatyn termınaldar ornatylǵan. Degenmen, jóndeý jumystarynan keıin bılet baǵasy qymbattaǵany baıqalady. Buryn úlken kisiler úshin – 500 teńge, balalar úshin 250 teńge bolsa, qazirgi ýaqytta úlkenderge – 700, balalarǵa 300 teńge kóleminde. Aıtpaqshy, halyqtyń jekelegen toptaryna jeńildikter qarastyrylǵan.
