Buǵan deıin omarta ustap, bal arasyn ósirý – elimizdiń kóptegen óńirleri úshin tańsyq bolyp keldi. Sondyqtan da atalǵan aımaqtaǵy taýar óndirýshiler ony dástúrli emes sharýashylyqtyń qataryna qosty. Sonyń biri – Aqtóbe oblysy. Áıtse de sońǵy kezde munda ara sharýashylyǵyn damytýǵa jan-jaqty kóńil bóline bastady. Osyǵan oraı oblysta tıisti is-sharalar jospary bekitildi. Atalǵan is óz bastaýyn ótken jyldan alady. Osy kezde 11 jeke kásipker ózderi bettesip kórmegen omarta ustaý kásibine bet buryp, bal óndirýge bel sheshe kirisip ketken eken. Al bıylǵy kórinis ótken jylmen salystyra qaraǵanda kóp ilgeri deýge bolady. Iаǵnı, arada bir jyl ótkende «Aqtóbe omartashylary» atty kooperatıv qurylyp, bul qurylym 34 kásipker-ara ósirýshiniń bastaryn biriktirdi.
Alaıda, munyń ózin de aldaǵy atqarylatyn úlken isterdiń alǵashqy qarlyǵashy dep sanaǵanymyz jón sekildi. Osy kózqaras turǵysynan qarastyrǵanda óńirde ara sharýashylyǵyn odan ári órkendetýdiń basty tutqalary men tetikteri qandaı bolmaq? Bul árıne, omartashylardyń shıkizat shylaýynda qalyp qoımaı, bal óndirýden ony óńdeý satysyna ótýlerin, sóıtip ázir taýarly ónim shyǵarý deńgeıine deıin jetýlerin qajet etedi. О́ńirde búgingi kúni mundaı jetistikke qol jetkizgen agroqurylymdar da bar. Osy oraıda «Tańsholpan» sharýa qojalyǵy kósh bastap keledi. Tipti osy fırmanyń quramyndaǵy mamandar baldy óńdeýge arnalǵan sehty da qurastyryp shyǵarypty. Tańsholpandyqtar ázirlegen ónimderin jańa dızaınmen saýda oryndaryna jóneltý joldaryn da oılastyryp, ony qoraptar men bankilerge salynǵan kúıinde tutynýshylarǵa usynýdy josparlap otyr eken.
Endeshe osynaý jergilikti ónimniń tanymaldyǵyn, bási men mártebesin kóterý jáne artyqshylyǵyn jetkizý máseleleri de qosa oılastyrylǵany artyqtyq etpeıdi. Oblystyq aýyl sharýashylyǵy basqarmasynyń basshysy Qusaıyn Sársembaıdyń málimdeýinshe, buǵan baılanysty jáıtter qazirdiń ózinde sheshimin taba bastapty. Oıdy oı qozǵaıdy. Alǵashqy pikirdi ekinshi bir pikir odan ári jalǵaıdy. Ádette seleksııalyq asyldandyrý jumystary degen tirkes kóp jaǵdaılarda mal sharýashylyǵyna qatysty aıtylatyny belgili. Bul tar túsinik bolyp shyqty. Sondaı-aq, mundaı ister ara sharýashylyǵyn bıik sapalyq deńgeıge jetkizýge de asa qajet eken. Jergilikti vedomstvo jetekshisi bul turǵyda Úkimet jeti mıllıon teńge kóleminde qarjylaı qoldaý kórsetýdi belgilegenin qanaǵat kóńil kúımen jetkizdi.
Osy materıaldy gazet óndirisine ázirleý barysynda uqqanymyz elimizde ara sharýashylyǵyn odan ári damytý turǵysynda tutastaı alǵanda áli de sheshimin tappaǵan máselelerdiń jetkilikti ekendigi. Bul baǵyttaǵy basty problemalardyń biri kásibı ári bilikti kadrlar men mamandardyń jetispeıtini bolyp otyr. Atalǵan túıtkildi máselege taıaý arada joǵary ókiletti organdar tarapynan tıisti kóńil aýdarylmasa, elimizdegi ara sharýashylyǵy toqyraýǵa ushyraýy ábden múmkin dep qaýip etedi dástúrli emes sala janashyrlary.
Búgingi kúni ǵylymı izdenisterdi qajet etpeıtin óndiris salasyn tabý qıyn-aq. Ara sharýashylyǵy da oǵan zárý ekenine kóz jetkizdik. Atalǵan is alǵa jyljýy úshin Aýyl sharýashylyǵy mınıstrligi tıisti usynystar bildirse, olqylyǵymyzdyń orny tolar edi deıdi aqtóbelik omartashylar. Sondaı-aq, olar bal óndirý men óńdeý salasyn jetik meńgergen besaspap, kásibı mamandardyń qatysýymen tájirıbelik semınarlar ótkizý qajettiligin de alǵa tartty.
Oıymyzdy túıindeı kele, oblysta aldaǵy jyldarǵa arnalǵan ara sharýashylyǵy salasyn damytý jónindegi baǵdarlama jobasyn qabyldaý qajettiligi týyndap otyrǵanyn aıtqymyz keledi. Aqtóbe oblystyq aýyl sharýashylyǵy basqarmasynyń basshysy Qusaıyn Sársembaı oblystyq máslıhattyń kezekti sessııasy kezinde mundaı usynysty máslıhat depýtattarynyń nazaryna usyndy.
Qajetti de paıdaly usynys olardyń tarapynan aıaqsyz qala qoımas degen oıdamyz.
Temir QUSAIYN,
«Egemen Qazaqstan»
AQTО́BE
Sýrette: ara sharýashylyǵynan kórinis
