Qazaqstan búgingi tańda álemdik týrıstik keńistiktiń ózindik orny bar bir bóligine aınaldy. Álem nazaryna usynylǵan EKSPO-2017 kórmesi osy joldaǵy jańa qadam bolyp sanalady.
Elimizdiń táýelsizdik jyldarynda qol jetkizgen osynaý tabystary Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń júrgizip kele jatqan salıqaly saıasatynyń negizinde múmkin boldy. Búgingi Qazaqstan kelbetinen biz armandaǵan, biz qalaǵan bolashaqtyń beınesi anyq kórinedi. Bizdiń elimiz ıadrolyq qarýsyz álem qurýdy, konfessııaaralyq jáne ultaralyq kelisimdi nyǵaıtýdy, áskerı shyǵyndardy áleýmettik maqsattarǵa jumsaýdy, ekstremızm men terrorızmge qarsy ymyrasyz kúresti, bolashaq energııasy salasyndaǵy jańashyl qadamdardy jaqtaı otyryp, osy baǵyttar boıynsha keleshekke arnalǵan maqsat-mindetterin naqtylaı tústi.
Osylaısha, elimiz bolashaq álemdi qurylymdaý úrdisiniń belsendi qatysýshysyna aınaldy. Qazirgi tańda Qazaqstan jahandyq saıası úderisterdiń meınstrımi bolyp tabylady. Bul sózimizge dálel retinde álemdi tolǵandyrǵan kóptegen jahandyq problemalardyń túıinin sheshý maqsatynda uıymdastyrylǵan tarıhı kelissózderdiń Astanada ótýin aıtýǵa bolady. Máselen, Iran ıadrolyq baǵdarlamasyna qatysty álemdik túrli kózqarastardy bir-birine jaqyndastyrýda, Sırııa daǵdarysyn retteýde Astana bedeldi ári baısaldy beıtarap alań bola bildi.
Qazaqstan shynaıy kózqarastar men oń qalyptasqan úderisterdi ózara úılestirip otyr. Qazirgi tańda syn-qaterler men daǵdarystardan saqtanýǵa baǵyttalǵan «Aldyn alý dıplomatııasy» uranyn basshylyqqa alý mańyzdy. Bul oraıda kóbine áleýmettik-ekonomıkalyq máselelerge basa nazar aýdaryp, «beıbitshilik», «qaýipsizdik» jáne «damý» úshtiginiń ajyraǵysyz baılanysy («Security-Development Nexus») qaǵıdasyn jan-jaqty damytý qajettigi basymdyqqa alynýda. Osy turǵyda turaqty damý maqsattaryn sátti júzege asyrý mańyzdy máselege aınalyp keledi. Atalǵan baǵyttaǵy áreketterimizdiń barlyǵy Qazaqstannyń strategııalyq baǵdarlamalyq qujattaryna sáıkes keledi. Sonymen qatar, BUU maqsattarymen jáne jahandyq basymdyqtarmen sátti úndestik tabady.
Búgingi tańda elimiz Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda kórsetilgen rýhanı jańǵyrýdyń mańyzdy kezeńin bastan ótkerip jatyr. Sol sebepten de mundaı aýqymdy sharanyń Qazaqstannyń Úshinshi jańǵyrýynyń bastalýy aıasynda ótýiniń aıryqsha mańyzy bar.
Al BUU Qaýipsizdik Keńesine músheligimiz jas memleketimizdiń syrtqy saıası strategııasyn júzege asyrý barysyndaǵy iri jeńisi bolyp tabylady. Sonymen birge, bul – táýelsiz elimizdiń álemdik arenadaǵy sapalyq jańa mártebesine ıe bolýynyń aıqyn dáleli.
Osy rette biz Qazaqstannyń BUU Qaýipsizdik Keńesindegi jumysyn jalpyulttyq joba retinde qarastyrǵanymyz jón. Ásirese, Qaýipsizdik Keńesiniń alańyn ıadrolyq qarýsyzdaný men taratpaý jónindegi óz oı-pikirimizdi, bastamalarymyzdy ilgeriletý úshin barynsha paıdalanýymyz qajet. Qazaqstan KHDR jónindegi komıtettiń jumysyna da belsendi qatysýda. KHDR-diń ıadrolyq-raketalyq baǵdarlamasy búginde beıbitshilik pen qaýipsizdik úshin eń eleýli syn-qaterlerdiń biri bolyp otyr.
Qoryta aıtqanda, Qazaqstannyń tereńnen oılastyrylǵan syrtqy saıasaty, onda qamtylǵan basym baǵyttar jahandyq úderisterge, álemdik aǵystarǵa ońtaıly, jaǵymdy sıpatta ún qosýda. Bul baǵytymyz elimizdiń jetistikterin eselep, el táýelsizdiginiń nyǵaıýyna oń yqpal ete beretin bolady.
