Foto: istockphoto.com
Polısııa málimetinshe, 2022 jyldyń qyrkúıeginde Sharbaqty kentindegi jeke úılerdiń birinen jergilikti turǵynnyń máıiti tabylǵan. Tergeý is-sharalarynyń júrgizilýine qaramastan, qylmysty jedel ashý múmkin bolmaǵan.
«2026 jyly polısııa qyzmetkerleriniń muqııat jumysy, qosymsha jedel-izdestirý sharalaryn júrgizýi jáne marqumnyń baılanys ortasyn tolyq tekserýi nátıjesinde kúdikti anyqtaldy. Ol qaza tapqan azamattyń tanysy bolyp shyqty. Tergeý barysynda oqıǵa kúni er adamdardyń birge spırttik ishimdik ishkeni anyqtaldy. Aralarynda týyndaǵan janjal kezinde kúdikti jábirlenýshige dene jaraqattaryn salǵan, sonyń saldarynan ol kóz jumǵan», delingen habarlamada.
Aqpan aıynda kúdikti óz kinásin moıyndap, ýaqytsha ustaý ızolıatoryna qamaldy. Naýryz aıynda Pavlodar oblysy Sharbaqty aýdandyq soty qylmyskerge 8 jylǵa bas bostandyǵynan aıyrý jazasyn taǵaıyndaǵan.
Pavlodarda er adam jedel járdem qyzmetkerlerine shabýyl jasady
Ishki ister mınıstrliginiń habarlaýynsha, bıyl jedel-izdestirý is-sharalarynyń nátıjesinde densaýlyqqa qasaqana aýyr zııan keltirýdiń 17 deregi ashylǵan. Olardyń ishinde tórt kisi ólimi tirkelgen.
Eske sala keteıik, buǵan deıin Bas prokýratýra Pavlodar oblysynda alıment tólemegen azamattarǵa arnaıy izdeý jarııalanǵanyn málimdedi. Aımaqta «TOP-100 izdestirilip jatqan boryshkerler» respýblıkalyq tizbesine engizilgen azamattardy anyqtaý maqsatynda jumys toptary qurylǵan. Búginde tizimge engen alty boryshkerdiń beseýiniń ornalasqan jeri anyqtalǵan.
