Konferensııaǵa elimizdiń Syrtqy ister mınıstri Qaırat Ábdirahmanov, Prezıdenttiń halyqaralyq máseleler jónindegi kómekshisi Nurlan Onjanov, Parlament Májilisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev, «Astana EKSPO-2017» ulttyq kompanııasy» AQ basqarma tóraǵasy Ahmetjan Esimov, sondaı-aq, elimizdegi shet memleketterdiń qazirgi jáne burynǵy elshileri qatysty.
Alqaly jıyndy Elbasy kitapxanasy, Syrtqy ister mınıstrligi, Qazaqstannyń Tuńǵysh Prezıdenti – Elbasy qory, qor janyndaǵy Álemdik ekonomıka jáne saıasat ınstıtýty birlese otyryp uıymdastyrdy.
Konferensııany júrgizgen Qaırat Ábdiraxmanov aldymen kópshilik nazaryna Qazaqstan Respýblıkasy dıplomatııalyq qyzmetiniń 25 jyldyǵyna arnalǵan beınebaıandy usyndy. Bul beınebaıanda elimizdiń syrtqy saıasatynyń basty kezeńderi, onyń damý joldary, álemniń alpaýyt elderimen áriptestik qarym-qatynas ornatýy, Elbasynyń Semeı polıgonyn jaýyp, ıadrolyq qarýdan bas tartýy, elimizdiń egemendik alǵannan keıingi jetken jetistikteri qysqasha kórsetildi.
Jıynda sóz alǵan Benılıýks elderindegi burynǵy elshi, búginde «Astana EKSPO-2017» ulttyq kompanııasynyń basshysy Ahmetjan Esimov ótken kúnderge sholý jasap, óziniń Eýroodaqta jáne NATO-da turaqty ókil qyzmetin atqarǵanyn, Qazaqstan-Eýroodaq birlesken komıssııasynyń tóraǵasy bolǵanyn aıtty jáne sol ýaqyt aralyǵynda jınaǵan tájirıbesin qazirgi qyzmetinde de paıdalanyp júrgenin málimdedi.
– Elimiz kópvektorly syrtqy saıasat ustanýynyń arqasynda óz shekaramyzdy aıqyndadyq, ekonomıkamyzdy damyttyq. Sonymen qatar, xalyqaralyq prosesterge qatysýy arqyly Qazaqstan ashyq jáne beıbitsúıgish el retinde tanylyp keledi. Osy jumystarda dıplomattarymyzdyń ról atqarǵandary anyq, – dedi Axmetjan Esimov.
Konferensııa barysynda sóz alǵan Qazaqstannyń Tuńǵysh Prezıdenti – Elbasy kitapxanasy dırektorynyń orynbasary Ámirxan Raxymjanov 25 jyl ishinde Memleket basshysynyń túrli deńgeıdegi minberlerden kóptegen ıdeıalar usynǵanyn, onyń barlyǵy derlik qoldaý tapqanyn erekshe atap ótti.
Sonymen qatar, shara barysynda Elbasy Nursultan Nazarbaevtyń Sırııadaǵy daǵdarysty retteý joldaryn izdeýge arnalǵan belsendi áreketteri jaıly Nurlan Onjanovtyń «Bitimger: Sırııa túıini» atty kitaby tanystyryldy. Kitapta Elbasynyń bitimgerlik qyzmeti ár qyrynan ádemi ashyp kórsetiledi.
– Táýelsizdiktiń alǵashqy jyldarynan bastap Elbasymyzǵa bitimgerlik jóninde ótinishter kóptep túsken. Memleket basshysynyń bitimgerlik qyzmeti árqashan tabysty júzege asyp keledi. Máselen, Taýly Qarabaq qaqtyǵysyn retteýge, 2005-2010 jyldary Qyrǵyzstanda jaǵdaıdy turaqtandyrýǵa qatysty is-sharalar úlken úlesin qosty. Sonymen qatar, Memleket basshysynyń Túrkııa men Reseı arasyndaǵy shıelenisti sheshýde mańyzdy ról atqarýy elimizdiń bedelin odan ári arttyra tústi, – dedi Nurlan Onjanov.
Sharaǵa jınalǵan qaýym elimizdiń dıplomatııalyq qyzmetine arnalǵan «Táýelsiz Qazaqstan dıplomatııalyq qyzmetiniń 25 jyldyq tarıhynan» atty fotosýretter kórmesimen tanysty.
Aıta keteıik, Qazaqstan 1991 jyly táýelsizdik alǵan kúnnen bastap, álemniń 130 memleketimen dıplomatııalyq qarym-qatynas ornatty.
Aıan ÁBDÝÁLI,
«Egemen Qazaqstan»
