«Baǵdarlamaǵa Qazaqstan, TMD, AQSh, Germanııa, Polsha, Ýkraına, Belarýs, Iran, Sırııa, Egıpet elderi ǵalymdarynyń 167 jumysy endi. Konferensııada telekommýnıkasııa men energetıka salasynyń ózekti máseleleri talqylanyp, jelini basqarý, symsyz tehnologııa, ınternet-dúnıeler (IoT), energotıimdilik, kompıýterlik ólsheý tehnologııasy, sıgnaldardy óńdeý, robototehnıka jáne basqa da salalarǵa qatysty zertteýler usynyldy», dedi uıymdastyrýshylar.
Basqosýda «Qazaqstan ǵarysh sapary» ulttyq kompanııasynyń vıse-prezıdenti Aıdyn Aıymbetov elimizdiń ǵaryshtyq tehnologııalar salasyndaǵy jetistikteri týraly baıandama jasady.
Qazaq agrotehnıkalyq ýnıversıtetiniń rektory Aqylbek Kúrishbaev elektronıka men elektrotehnıka salasynyń jetistikterin utymdy qoldanýdyń aýyl sharýashylyǵy salasy úshin erekshe mańyzdy ekenin jetkizdi. «Álemde «smart agriculture» – «aqyldy aýyl sharýashylyǵy» keń taraǵan. Avtomattandyrylǵan júıeler buryn adamdar qolmen istegen eńbegin kompıýter arqyly myńdaǵan shaqyrymnan basqarýǵa múmkindik berip otyr. Mysaly, kompıýter adamǵa qaraǵanda, jerge qandaı tyńaıtqysh kerektigin, qalaı sýarý kerek ekenin dál esepteıdi. Bul tyńaıtqyshtardy qoldanýdy 30 paıyzǵa azaıtýǵa, ónimniń ózindik qunyn arzandatýǵa múmkindik beredi. Ári qorshaǵan orta úshin de qaýipsiz», dedi ýnıversıtet rektory. Onyń aıtýynsha, osyndaı ozyq tehnologııalarmen tanysyp, olardy Qazaqstan jaǵdaıyna beıimdeý úshin ǵylymı basqosýlardyń mańyzy zor.
Jıynnan soń, SIBCON baǵdarlamasy aıasynda «National Instruments» kompanııasy dástúrli «Kompıýterlik ólsheý tehnologııasy» kórmesi men sımpozıýmyn uıymdastyrdy.
