Kórme keshenine kiretin qaqpalarda tekserip ótkizý júıesi barynsha kúsheıtilgen. Rentgen-televızııalyq qondyrǵylardyń, metall jáne jarylǵysh zattardy anyqtaıtyn detektorlardyń kómegimen tekserip-qaraý júrgiziledi. «EKSPO nysandarynyń arnaıy komıssııasy jarylǵysh zattardy, radıoaktıvti, hımııalyq jáne basqa da komponentterdi anyqtaý maqsatynda kún saıyn tekserý júrgizip otyrady. Kınologtar jarylǵysh zattardy izdeýge úıretilgen qyzmettik ıttermen kórmeniń avtoturaqtar aýmaǵy men kiretin esikterin tekseredi. Mobıldi tekseris kesheni kómegimen kórme aýmaǵyna kirgiziletin taýarlar men júkter muqııat qaralady», deıdi mamandar.
Qorǵanys mınıstrligi ushqyshsyz ushatyn tirkelmegen ushý apparattarynyń kórme aýmaǵynda ushýyna jol bermes úshin 3 shaqyrym radıýstegi aýmaqqa jáne 3000 metr bıiktikke shekteý qoıǵan bolatyn. Ushqyshsyz ushatyn ushý apparattaryn basqaratyn sıgnaldardy bógeýge radıoelektrondy qondyrǵylar paıdalanylady. Bul top áýeni qurylǵy arqyly qadaǵalaıtyn polısııanyń jedel tobymen birge jumys isteıdi. Áýeni qadaǵalaý qurylǵylary kórmeniń aýmaǵyna jáne oǵan jaqyn kóshelerge de ornatylǵan.
«Elordadaǵy árbir mádenı-kópshilik, sporttyq jáne qoǵamdyq-saıası is-sharalar Ishki ister mınıstrliginiń qatań qadaǵalaýynda. Sharalar qaýipsiz ótkizilýi úshin tıisti kúsh pen quraldar bólinip, arnaıy monıtorıng júrgiziledi. Kórme ashylǵan ýaqyttan beri onyń aýmaǵynda 100 shaqty mádenı-kópshilik is-shara ótkizildi», deıdi mamandar.
EKSPO kórmesin ótkizý kezinde qaladaǵy qonaq úıler men qonaq jaılardaǵy qoǵamdyq tártip kúzetine 110 polısııa qyzmetkeri bólingen. Olardyń sany elordaǵa kelgen qonaqtardyń mólsherine baılanysty tolyqtyrylyp otyrady.
Ashat RAIQUL,
«Egemen Qazaqstan»
