Q.Toqaev aımaqtardaǵy máslıhat depýtattary men halyqtyń olarǵa kórsetken senimniń joǵary deńgeıin atap ótip, Senattyń jańa múshelerin quttyqtady. Spıker olardyń túrli salalardaǵy eńbekteri barysynda jınaqtaǵan mol tájirıbeleri Parlamentte tabysty qyzmet etýiniń kepili bolaryna senim bildirdi.
«Kelesi sessııada aldymyzda qaýyrt jumystar kútip tur. Eń aldymen, Elbasynyń saıasatyn zańnamalyq turǵydan qoldaý jáne júzege asyrý boıynsha atqarylyp jatqan keshendi jumystardy jalǵastyratyn bolamyz. Jalpy, búgingi kúni Parlament qaraýynda 30-ǵa jýyq zań jobasy bar», – dep atap ótti Q.Toqaev.
Senat Tóraǵasy jańa depýtattardy Palata jumysynyń erekshelikteri týraly habardar etti jáne Palatanyń kelesi sessııasynyń kezekti otyrysynda Parlament pen Senat Reglamentine túzetýler engizilýi kútilip otyrǵanyn eske saldy.
Sol kúni Q.Toqaev ókilettilik merzimi aıaqtalǵan senatorlarmen kezdesti. Spıker, zań shyǵarý qyzmetine úlken úles qosqany, el ómirindegi áleýmettik-ekonomıkalyq jáne saıası ózgeristerge belsendi qatysqany úshin parlamentshilerge alǵysyn bildirdi. Kezdesý sońynda olar Senat Tóraǵasynyń Alǵys hatymen jáne Senattyń Qurmet gramotasymen marapattaldy.
