Ol jaıly belgili jýrnalıst Qaınar Oljaıdyń «Pil til qatty» degen maqalasy da bar. Keıin pildiń erekshe qasıeti álem ǵalymdarynyń nazaryna iligip, haıýanattar týraly ártúrli ǵylymı izdenisterdiń damýyna jol ashqan. Jer betinde sóılep, dybys shyǵara alatyn sútqorektiler ilýde bireý ǵana, tipti, óte sırek kezdesedi. Sondyqtan, 1979 jyldary Batyr týraly derekter keńinen taralyp, sheteldik «Nature», «Scientific American» syndy jýrnaldardyń basty jańalyǵyna aınalǵan.
Búgingi tańda Batyr jaıly barlyǵy bilgenimen, osy kúnge deıin tańǵajaıyp tabıǵat qubylysy ekrandalmaǵan eken. Jýyrda eski tarıhty el nazaryna usynbaq nıette belgili akter Farhat Ábdiraıymov «Batyr» atty jańa fılmniń túsirilimi bastalǵandyǵyn habarlady.
Jańa fılmge úsh eldiń, ıaǵnı Qazaqstan, Kanada, Meksıkanyń kıno sheberleri óz qoltańbalaryn qaldyrmaq. Haıýanattar baǵy qyzmetkerleriniń jáne ózge de adamdardyń aıtýynsha, Batyr jalpy jıyntyǵy 20-dan astam qazaq jáne orys sózderin aıta alǵan. «Úlken armanymyz 4 jyldan keıin oryndalýda. Rejısser Baýyrjan Dosmaǵambetov bul ıdeıany jarty jyl boıy júreginde saqtap keldi. Batyrdy endi búkil álem tanıdy dep úmittenemiz. Biz úsh elden halyqaralyq komandanyń basyn qostyq. Bizdiń fılmde aıtylǵan jarqyn ári meıirimge toly hıkaıa júregimizde máńgi qalatynyna senemiz» – dep jazady óziniń ınstagramdaǵy paraqshasynda fılm prodıýseri Farhat Ábdiraıymov.
Mıras ASAN,
«Egemen Qazaqstan»
Qaraǵandy oblysy
