– Bizdi mańyzdy oıyn kútip tur. Qazir árbir mınýtymyz sanaýly. Komandamyz erteń joǵary deńgeıde óner kórsetýi tıis. Alǵashqy matchta utqanymyzben, jaýapty kezdesýdiń ońaı bolmasy anyq. Bárin josparly túrde júzege asyryp, múmkindikterimizdi múlt jibermeýimiz qajet.
– Bul jolǵy negizgi quram alǵashqy oıynǵa qaraǵanda qanshalyqty ózgerýi múmkin?
– Iýrmaladaǵy oıynǵa qaraǵanda aıtarlyqtaı ózgeris bolady dep aıta almaımyn. Sebebi, bir apta ishinde jigittermiz tolyǵymen óz qalyptaryna kelip úlgerdi.
– Jaqynda «Spartak» bapkeri qyzmetinen ketti. Bul ózgeris latvııalyqtarǵa qanshalyqty keri áserin tıgizýi múmkin? Sonymen qatar, alǵashqy oıynda qarsylastaryńyzdyń qandaı basym tustary baıqaldy?
– Mundaı ózgerister ujymǵa qanshalyqty áser etetini belgisiz. Alaıda, bas bapkerdiń qyzmetinen ketýi jaqsy jańalyq dep aıta almaımyn. «Spartak» osal qarsylas emes. Biraq eki kún ishinde ózgeris bola qoıady dep oılamaımyn. Al bizge bastysy bosańsymaý kerek.
«Spartakta» pozısııasyn durys tańdaı alatyn oıynshylar jeterlik. Biz shabýyldy nátıjeli aıaqtaýdy oılaýymyz kerek. Árıne, eń basty maqsat – kelesi kezeńge joldama alý. Chempıondar lıgasynda bári oınaǵysy keledi. Sondyqtan bul jerde ońaı qarsylas bar deý qısynǵa kelmes. Ár komanda jeńiske jetý úshin baryn salady. Biz «Astana-Arenadaǵy» jeńilissiz serııamyzdy jalǵastyramyz dep úmittenemin. Qolymyzdan kelse birinshi gol soǵýǵa tyrysamyz, bolmasa, qaqpamyzǵa dop jibermeýdi maqsat etemiz. Bul kezdesýde 1:0 esebimen jeńsek, soǵan qatty qýanar edim.
– Úshinshi raýndtyń jerebe nátıjesi týraly qandaı oıdasyz?
– Bul jerde bári belgili dep oılaımyn. «Legııa» kelesi kezeńge bir taban jaqyn tur. Ázirge bárin aldyn ala josparlaýǵa bolmaıdy. Bul fýtbol. Munda bári bolýy múmkin. Sol úshin barlyq jaıtqa aldyn ala daıyn bolýymyz kerek.
– «Astananyń» jazǵy transferdegi jumysyna kóńilińiz tola ma?
– Jańadan eki oıynshy keldi. Ázirge Tomasovtyń keıbir máselelerge baılanysty qatysa almaıtyny qıyndaý bolyp tur. Biz taǵy bir pozısııaǵa jańa oıynshy alýdy josparlaǵan edik. Biraq bul oıymyz júzege aspaı tur.
Aıta keteıik, Chempıondar lıgasynyń irikteý kezeńinde elordalyq «Astana» Latvııanyń «Spartak» komandasyna qarsy alǵashqy matchta 1:0 esebimen jeńiske jetken bolatyn. Bul kezdesýde jalǵyz goldy Patrık Tvýması 73-mınýtta soqty.
Aıan ÁBDÝÁLI,
"Egemen Qazaqstan"
