Qazaqstandaǵy bıznestiń damýyna jasalyp jatqan qolaıly jaǵdaı shetel ınvestorlaryn elimizde joǵary texnologııalyq zamanaýı kásiporyndardyń qurylysyna qarjy quıýǵa degen qyzyǵýshylyǵyn oıatýda. Sonyń bir dáleli – «Seven Refractories Asia» zaýytynyń iske qosylýy. Investısııanyń jalpy somasy 1,9 mlrd teńgeni qurap otyr. Aıtýly jobanyń ashylý saltanatyna aımaq basshysy Erlan Qoshanov arnaıy qatysty.
– Bul zaýyttyń ashylýy – Elbasy tapsyrmalary oryndalýynyń taǵy bir kórinisi. Materıaldyń bul túrin óndiretin zaýyttyń Qazaqstanda balamasy joq. Sondyqtan, elimizdegi júıe quraýshy «Qazaqmys», «ArselorMıttal Temirtaý», «Kazsınk» syndy iri kásiporyndardyń otqa tózimdi materıaldarǵa degen suranysy óte joǵary. Buǵan deıin atalǵan kásiporyndar bul materıaldardy shetelden satyp alyp kelse, endi, Qaraǵandyda ornalasqan zaýyttan alatyn bolady. О́z kezegimde, bul zaýyttyń boı kóterýine birden-bir sebep bolǵan «Seven Refractories Asia» zaýytynyń prezıdenti Erık Zobeske alǵysymdy bildirgim keledi, – dedi Erlan Qoshanov.
Sóıtip, shara barysynda «Seven Refractories Asia» kompanııasy «ArselorMıttal Temirtaý» AQ-pen jáne «Qazaqmys» korporasııasy» JShS-men otqa tózimdi materıaldarmen qamtamasyz etý boıynsha birlese jumys jasaý týraly memorandýmǵa qol qoıdy.
Jylyna 45 myń tonna ónim óndirýge qaýqarly «Seven Refractories Asia» zaýytynyń qurylysy 2015 jyly bastaldy. О́nim negizinen qara, túrli-tústi metallýrgııa, sement óndirý, munaı jáne munaı-gaz ónerkásipterinde qoldanylady. Al, zaýyttyń Qaraǵandyda irge qalaýynyń sebebi – munda iri «ArselorMıttal Temirtaý» AQ ornalasqan jáne Reseıdegi zaýyttardan da qashyq emes. Eń bastysy, otqa tózimdi materıaldardy óndirýge qajetti shıkizat kózderi bar Qytaı elinen alshaq ta emespiz, – dedi «Seven Refractories Asia» JShS-niń bas dırektory Maksım Glazýnov.
Jańa zaýyt Slovenııada jasalǵan zamanaýı quraldarmen jabdyqtalǵan. Qazirgi tańda kásiporynda 51 jumys orny ashylǵan, aldaǵy ýaqytta qyzmetkerler sany ulǵaıtylady. Zaýyt ónimi álemdik standarttarǵa saı.
Kásiporynnyń ashylý saltanatynda zaýyttyń bas dırektory jáne «Qazaqmys» pen «ArselorMıttal Temirtaý» kompanııalary ókilderi arasynda memorandýmǵa qol qoıyldy.
Jalpy, «Seven Refractories» holdınginiń 30 jyldan astam jumys tájirıbesi bar jáne ol zamanaýı otqa shydamdy materıaldar keń spektrin shyǵarady. Kompanııanyń halyqaralyq bólimsheleri Slovenııa, Germanııa, Avstrııa, Italııa, Ýkraına, Reseı jáne Qazaqstanda ashylǵan.
Mıras ASAN,
«Egemen Qazaqstan»
Qaraǵandy oblysy
