Teńiz jaǵalaýynda QR UQK «Batys» ShQ basqarmasy estafeta sımvolyn aımaqtyq Jaǵalaý kúzeti basqarmasyna tabystady. Bul saltanatty sátke 250 teńizshini qosqanda barlyǵy 350 jeke quram, áskerı kemeler men tikushaqtar qatysty. Teńizde áskerı kemeler sap qursa, tikushaqtar kók aspanda qalyqtady, al jaǵalaýda shekarashylar turǵyndarǵa qoıan-qoltyq urys kórinisterin kórsetti.
QR UQK aımaqtyq Jaǵalaý kúzeti basqarmasynyń bastyǵy polkovnık Á.Kaıýpovtyń aıtýynsha, jaǵalaý kúzetiniń garnızon quramy Qazaqstannyń 2480 shaqyrym shekarasyn kúzetse, onyń 1595 shaqyrymyn teńiz jaǵalaýy quraıdy.
«Bizdiń maqsatymyz – memlekettik shekaranyń buzylýyna jol bermeý jáne elimizdiń aımaqtyq tutastyǵyn qamtamasyz etý, sondaı-aq onyń bıologııalyq resýrstaryn qorǵaý», – deıdi polkovnık.
QR UQK shekara qyzmetiniń 25 jyldyǵyna arnalǵan estafeta 2017 jyly 18 tamyzda Astana qalasynda óz máresine jetedi.
Gúlaıym ShYNTEMIRQYZY,
«Egemen Qazaqstan».
Foto: Serik MAIEMEROV
Mańǵystaý oblysy
