Brazılııalyq shabýylshy maýsym aldyndaǵy týrlardan keıin "Barselonamen" birge Ispanııaǵa oralmaǵan.
Osyǵan deıin PSJ basshysy Nasser ál Helaıfı osy transfer úshin kelisimshartta kórsetilgen 220 mln eýrony tóleýge daıyn ekenin málimdegen bolatyn. Al oıynshynyń parıjdik ujymǵa aýysqany úshin 50 mln eýro, al onyń ákesi ári agenti 36 mln eýro kóleminde syıaqy almaq.
Sonymen qatar, Neımar 2022 jyly Qatarda ótetin álem chempıonatynyń elshisi atanýy múmkin.
Aıta keteıik, Neımardy katalonııalyq komanda 2013 jyldyń jazynda brazılııalyq "Santostan" resmı túrde 57 mln eýroǵa satyp alǵan. Alaıda klýbty da, oıynshyny da Ispanııa men Brazılııanyń arnaıy mekemeleri salyq tóleýden jaltardy dep aıyptap, túrli kólemde aıyppul salǵan bolatyn. Taǵy bir aıta keterligi osy transferden "Santosqa" resmı túrde 17 mln eýro ǵana túsken. Al qalǵan qarjy Neımarǵa ıelik etetin kompanııaǵa aýdaryldy.
Eger aldaǵy ýaqytta Neımar resmı túrde parıjdik ujymǵa aýysar bolsa, qarjylyq feır pleı zańyn buzýy ábden múmkin. Al eger osy jaıt tirkelgen bolsa, ÝEFA basshylyǵy PSJ-ny Chempıondar lıgasy men Eýropa lıgasyna qatysýyna shekteý qoıyp, jańa transferler jasaýyna tyıym salýy múmkin.
Ol "Barselona" sapynda búginge deıin barlyǵy 186 resmı oıynǵa qatysyp, 106 goldyń avtory atandy.
