Ádettegideı, ulttyq kún Qazaqstan men Lesotonyń memlekettik týlary kóterilip, ánurandary oryndalýymen bastaldy. Osydan keıin sahna tórine kóterilgen Qazaqstan Aqparat jáne kommýnıkasııalar vıse-mınıstri Qaırat Balyqbaev afrıkalyq qonaqtardy quttyqtady.
«Lesoto - bul «Aspan Koroldigi». Afrıkada taýly aımaqta ornalasqan jalǵyz memleket sanalady. Búkil álem týrısterin bul eldiń kórkem taýly shatqaldary, kóz tartarlyq sarqyramalary, balyq aýlaý demalysy qyzyqtyrady», - dedi vıse-mınıstr.
«Lesoto Koroldigi Úkimetiniń jáne óz atymnan «Astana EKSPO-2017» halyqaralyq mamandandyrylǵan kórmesine qatysý múmkindigin bergen Qazaqstan Úkimetine shynaıy rızshylyǵymdy bildiremin. Bizge kórsetilgen materıaldyq-tehnıkalyq qoldaýdyń arqasynda Lesoto álem halyqtaryna energetıkalyq sektordaǵy ınnovasııalyq múmkindikterin, sonymen qatar «Aspan Koroldiginiń» ádemiligi men kórikti oryndaryn kórsetýge múmkindik alyp otyr», - dedi óz kezeginde Lesoto Koroldiginiń Saýda jáne ónerkásip mınıstri Tefo Mapesela.
Sonymen qatar ol EKSPO qonaqtaryn «Aspan Koroldigine» týrıstik saparmen kelýge shaqyrdy.
«Sizder onda 5 juldyzdy qonaq úıge nemese týrısterge arnalǵan jaılarǵa ornalasa alasyzdar. Bazoto áserli tabıǵı kórinisterimen, mádenı jáne tabıǵı muralarymen tanymal. Biz sesotoǵa qosymsha aǵylshyn tilinde de sóıleımiz.Týrıstik kórikti jerlerde atpen serýendeýge, qustardy baqylap, balyq aýlaýǵa,shańǵymen syrǵanap, taýly aımaqtarǵa serýendeýge bolady», - dedi ol.
Munan bólek afrıkalyq meıman qazirgi ýaqytta Lesoto taý-ken qazba ónerkásibinde almas óndirýden álemde 9-shy orynda turǵanyn, bıylǵy maqsaty 7-orynǵa kóterilý ekendigin basa aıtty.
«Biz álemde joǵary baǵalanatyn úzdik, eń úlken, sapaly almastardyń birin óndiremiz. Lesotoda óndirilgen almastardyń irileri de bar. Olardyń ishinde Lesoto ýádesi 603 karat, Braýn Lesoto 601karat, Lesoto murasy 493 karat jáne Leselı la Leseng 478 karatty quraıdy. Lesoto almastarynyń 1 karatynyń quny da joǵary. Ol ortasha eseppen alǵanda 2500 dollarǵa teń», - dedi Tefo Mapesela.
Lesoto ulttyq kúniniń resmı ashylý rásimimen keıin afrıkalyq ártister baıannyń súıemeldeýimen án salyp, ózderiniń ulttyq bılerin bıledi.
