Búgin Astanaǵa at basyn tiregen boksshyny elordalyqtar áýejaıda qarsy aldy.
Boksshyny qarsy alýǵa jýrnalıster men qala turǵyndary bardy. Kezdesý barysynda Qanat aldaǵy jekpe-jek jaıyndaǵy jáne ózge de saýaldarǵa jaýap berdi.
Esterińizde bolsa, maýsym aıynda Astanada ótken baspasóz máslıxatynda Qanat Islam kelesi jekpe-jegin amerıkalyq boksshy Djeıms Kırklendke qarsy ótkizýdi josparlap otyrǵanyn aıtqan bolatyn. Keıin kanadalyq Brendon Kýkpen judyryqtasatyny belgili boldy. Osyǵan oraı qoıylǵan suraqqa Qanat: «Biz onyń barlyq talaptaryn oryndaıtynymyzdy aıtsaq ta Kırklend kelisimin bermedi. Tipti sol beti telefonyn da kótermeıdi. Menedjeri de, promoýteri de habarsyz ketti. Múmkin, aldaǵy ýaqyttarda judyryqtasarmyz», - dedi.
Aldaǵy aıqasqa elordada daıyndalýynyń bir sebebi Astananyń aýa raıyna beıimdelý ekenin de aıta ketken Qanat, «mundaǵy jattyǵýymyzda tek qana sparıngter ótkizetin bolamyz» - dep daıyndyq qyr-syrymen de bólisti.
Jankúıerler asyǵa kútken 9 qyrkúıek boks keshinde Janqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0, 2KO), Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev (2-0, 1KO) syndy jeńilip kórmegen judyryqshylar rıngke shyǵatynyn kózqaraqty jurt bilse kerek.
Búgin Qanat Islammen birge aldaǵy jekpe-jektiń anderkardynda judyryqtasatyn qazaqstandyq boksshy Nursultan Jańabaev ta keldi.
Bylǵary qolǵap sheberlerin Nelson Lopes bastap keldi.
