Osy jyldyń sońyna deıin taǵy 111 úı kúrelip, 1850 turǵyn jańa baspanasyna qonystanady dep josparlanyp otyr. Osyǵan oraı, elorda ákimdigi medıa ortalyǵynyń tilshileri apatty úılerdiń qalaı kúrelip jatqanyn kórip, jumysshylardyń bir kúndik jumysynan fotoreportaj daıyndady.
2013-2016 jyldar aralyǵynda kúrelgen tótenshe jaǵdaıdaǵy úılerde turyp kelgen 1570 otbasy jańa páterge qonystandy. Jyl sońyna deıin qonys toıyn toılaýshylardyń sany 1850 otbasyǵa kóbeımek. Sebebi, bıylǵy jyldyń sońyna deıin kúreletin apatty úılerdiń turǵyndaryna osynsha páterdiń kilti tabystalady.
Jalpy kúrelip jatqan úılerdiń deni ótken ǵasyrdyń 40-70 jyldarynda salynǵan. Tozyǵy jetken úılerde turý adam ómirine qaýip tóndiredi. Injenerlik jeliler tozǵan, esik-terezeleri shirigen úılerdiń edenderi men jeltóreleriniń jaǵdaıy aıtpasa da túsinikti. Sózimizdiń basynda atap ótkendeı jyl sońyna deıin 111 úıdi kúreý kózdelip otyr. Elordadaǵy eń kóp apatty úı Saryarqa aýdanynda. Olardyń sany - 124. Almaty aýdanynda - 82, al Esilde - 22 tozyǵy jetken úı bar-dy.
Apatty úılerdi buzý jumysy ǵımarattyń tóbesin ashýdan bastalady. Odan soń jylý jeliler men tóbedegi beton qaptamalary alynady. Kirpishterin bir bólek, qoqystaryn birbólek jınap, eń sońynda qala syrtyndaǵy qoqys polıgonyna jóneltiledi. Jyl sońyna deıin kúreletin úılerdiń oryndaryna Astana bıligi saıabaqtar men gúlzarlar salýdy josparlap otyr.
Bul úılerdi kúreý eń aldymen azamattardyń qaýipsizdigin qamtamasyz etý úshin qajet. О́mir súrý deńgeıiniń sapasyn arttyrý da kún tártibindegi basta másele emes pe? Sondaı-aq qorqynyshty fılmdegi jartylaı qırap, dal-duly shyqqan úıler elordanyń sánin kirgizbesi anyq. Sáýleti men saltanaty kún sanap asqaqtap jatqan Astananyń turǵyndary jaqsy ári jaıly hám jańa úıde tursa da bolady.
О́kinishtisi, turǵyndardyń bári muny túsine bilmeıdi. Búginde apatty úılerde turyp kelgen elordalyqtardyń 95 paıyzy jańa páterlerge kóshýge kelisti. Al keıbir turǵyndar jańa baspanadan bas tartyp otyr.
